Katër aktorë të Teatri Kombëtar, këtë mbrëmje me krijimtarinë e autorëve shqiptarë dhe të huaj

Katër aktorë të Teatrit Kombëtar bëhen bashkë në një mbrëmje me krijimtarinë e autorëve shqiptarë dhe të huaj. Poezi dhe prozë do të interpretohen nga aktorët Olta Daku, Helidon Fino, Erjona Kakeli dhe Lulzim Zeqja. Krijimtaria që do të vijë në programin artistik online të Teatrit Kombëtar këtë mbrëmje është nga autorët Ylli Demneri, Robert Burns dhe Charles Baudelaire. Teatri Kombëtar shprehet se kjo mbrëmje vjen në pritje të rikthimit në skenë me produksionin madhështor “Coriolanus”. “Ju ftojmë të na ndiqni me aktivitet tona online duke filluar nga nesër: poezi dhe prozë nga autorë shqiptarë dhe të huaj, 21 janar, ora 19:00, Facbook”, bënte me dije Teatri Kombëtar të enjten. Aktorët Olta Daku, Helidon Fino, Erjona Kakeli dhe Lulzim Zeqja janë emra të njohur të skenës sonë teatrore, me vlerësime për rolet që kanë sjellë para publikut në shfaqje të ndryshme. Teatri Kombëtar këtë fundjavë do të vijojë me programin artistik online, por ka bërë me dije se fundjavën që vjen do të jetë në skenë me produksionin “Coriolanus”. Në këtë program artistik, i cili zhvillohet online sipas institucionit për shkak të Covid-19, do të jenë me lexime artistike dhe vepra që janë në “Netët e leximit të dramës shqipe”. Sipas teatrit, më datë 22 janar vjen një prej këtyre veprave teatrore. ““Duke pritur Gobon” lexim artistik, 22 janar ora 19:00. Pjesë e projektit “Netët e leximit të dramës shqipe””, njofton më herët institucioni. Në këtë program ndërtuar online janë dhe pjesë nga cikli edukativ, që u zhvillua më parë në Teatrin Kombëtar. Historia e dramaturgjisë shqiptare nga prof. Josif Papagjoni, 23 janar ora 19:00, pjesë e ciklit edukativ - leksione për teatrin. “Duke pritur Gobon” që do të jetë lexim artistik të shtunën është një vepër e autorit Armand Bora.

Autorët

Ylli Demneri është shkrimtar dhe artist i imazhit. Ai ka pasur një përvojë të shkurtër në kinematografi. Prej disa vitesh i është kushtuar edhe poezisë dhe prozës. Deri më tani ka botuar disa libra si “Më kujtohet”, “E dashura A.”, “Block-notes” apo dhe “Njëqind e njëmbëdhjetë haiku”. Robert Burns, një autor i famshëm skocez. Puna e poetit u vlerësua shumë jo vetëm në atdheun e tij, ku ai u konsiderua një poet i shquar popullor. Poezia e tij e thjeshtë, dhe në të njëjtën kohë "e gjallë", emocionale, shprehëse është përkthyer në një numër të madh gjuhësh, duke formuar bazën e shumë këngëve. Periudha fillestare e krijimtarisë përfshin gjithashtu "John Barleycorn" 1782, "Lypsarët gazmorë" 1785, "Panairi i Shenjtë" 1786, etj. Poeti shpejt u bë i njohur në të gjithë Skocinë. Charles Pierre Baudelaire ishte një poet francez, i cili gjithashtu prodhoi vepra të shquara si një eseist dhe kritik arti. Poezitë e tij shfaqin mjeshtëri në trajtimin e rimës dhe ritmit, përmbajnë një ekzotizëm të trashëguar nga romantikët, por bazohen në vëzhgimet e jetës reale.