Kisha e Shën Marisë në Niçë, një ndërhyrje për ta shpëtuar

Kishën e Shën Marisë në fshatin Niçë është objekt kulti, pjesë e trashëgimisë kulturore. Në këtë objekt ka nisur një ndërhyrje për shkak të problematikave që mbart. Ministrja e Kulturës Elva Margariti  shprehet se është një ndërhyrje falë ndihmës financiare të familjeve me orgjinë nga kjo zonë, që janë bërë bashkë me shtetin. “Kënaqësi kur komuniteti dhe shteti bëhen bashkë për të shpëtuar trashëgiminë kulturore dhe shpirtërore. Prej ditësh ka nisur një ndërhyrje shpëtimi në Kishën e Shën Marisë, në fshatin Niçë, pasuri kulturore shumë e rëndësishme në zonë dhe në qarkun e Korçës. Një ndërhyrje falë ndihmës financiare të familjeve me origjinë nga kjo zonë dhe shoqata kulturore Nica Vllahe”, thotë Margariti në një status të saj në Facebook. Ministrja e Kulturës ka ndarë disa imazhe nga puna që po bëhet në këtë objekt, dhe thotë se është ekipi i Drejtorisë Rajonale të Trashëgimisë Kulturore të Korçës që po e realizon këtë ndërhyrje. “Kjo ndërhyrje shpëtimi konsiston në restaurimin e kambanarisë dhe çatisë të nartekstit, të cilat rrezikonin shembjen. Ekipi i DRTK Korçë po qëndron prej ditësh në një teren të vështirë për të realizuar këtë ndërhyrje të rëndësishme. Një falenderim për kontributin financiar të komunitetit, punën e palodhur të ekipit të DRTK Korçë si dhe mbështetjen e Bashkisë Pogradec për këtë nismë shpëtimi. Trashëgimia është e të gjithëve”, shprehet ministrja e Kulturës. Kisha e Shën Marisë në Niçë është një objekt i ndërtuar në vitin 1749 mbi gurthemelin shekullor të një kishe të hershme. Kisha është një dëshmi e qartë e qytetërimit dhe zhvillimit, e cila dikur u restaurua në fillim të Luftës të Parë Botërore nga vullnetarët e trupave franceze dhe banorët e zonës. Piktura murale në brendësi të saj shfaq disa skena të rralla dhe unike, të pikturuara nga vëllezërit Jeromonahu dhe autorë të tjerë të panjohur.