Kisha e Shën Ndout, Margariti: U përfshi në programin “EU4Culture”

Kisha e Shën Ndout në Kepin e Rodonit i është nënshtruar një procesi restaurimi. Objekti monument kulture është përfshirë në programin “EU4Culture” mbështetur nga BE. Ministrja e Kulturës Elva Margariti inspektoi nga afër punimet në këtë kishë dhe shprehet se është një prej monumenteve me bukuri arkitektonike. “Inspektuam nga afër punimet në Kishën e Shën Ndout në Kepin e Rodonit, një prej monumenteve me histori e bukuri arkitektonike, por edhe peizazhi rrethuar. Pas dëmtimeve të tërmetit 2019, ky objekt u përfshi në programin “EU4Culture”, mbështetur nga Bashkimi Europian dhe zbatuar nga UNOPS. Kanë përfunduar punimet konsoliduese e restauruese, për të vijuar me pikturat murale e shumë shpejt ajo do të mirëpresë komunitetin e besimtarëve dhe turistët që admirojnë bukurinë e këtij objekti”, shprehej të enjten në një status të saj ministrja Margariti. Ministrja thotë se është me shpresën që në fund të këtij muaji të presë besimtarët. “Punimet restauruese po shkojnë drejt përfundimit, me shpresën që në fund të këtij muaji të mirëpresë sërish besimtarë e vizitorë”, thotë ajo më tej. Kisha e Shën Ndout është një ndër kishat më të dëgjuara në periudhën e Mesjetës. Kjo edhe për shkak të ndërtimeve që bëri Skënderbeu në zonën e Kepit në shekullin XV. Për ndërtimin e kësaj kishe është përdorur teknika bizantine e klausonazhit si dhe mjaft analogji me kishat bizantine, gjë që dëshmon për vijimësinë e traditës bizantine. Po ashtu, në planin ndërtimor dallohen edhe elementë të arkitekturës romanike dhe gotike. Ndër fragmentet e ruajtura nga piktura murale, në pjesën e poshtme qendrore të absidës lindore paraqitet një shqiponjë dykrenore ndërsa më djathtas, një kalorës i ri pa mjekër dhe dy shpendë. Për shkak të vlerave të saj Kisha e Shën Ndout është njëra nga pikat e vizitueshme nga turistët vendas e të huaj.