Komedia “Shtëpiakë të dëshpëruar” në fundjavë në skenën teatrore

Komedia “Shtëpiakë të dëshpëruar” me regji nga Artan Imami në fundjavë është në skenën e Teatrit Kombëtar te “ArTurbina”. Komedia vjen në skenë nën interpretimin e aktorëve Gentian Zenelaj, Artan Imami dhe Indrit Çobani. Tre aktorët deri tani me këtë shfaqje kanë qenë në skena të ndryshme, por gjatë fundjavës janë në Teatrin Kombëtar për publikun. “Komedia që mban rekord të qeshurash & me të gjitha biletat e shitura, në çdo qytet ku ka udhëtuar, Durrës, Fier, Elbasan, Gjirokastër, Berat, Lezhë, Pogradec, Korçë e Tiranë. Me mbi 25.000 spektatorë”, thuhet në faqen e TK në rrjete sociale për komedinë. Vepra është vënë në skenë në vitin 2011 në Paris dhe vazhdon jetën e saj edhe sot. Mbi 1400 shfaqje dhe mbi 475.000 spektatorë. Pasi merr një letër-ndarjeje nga e dashura e tij Sofi, Xherom (Aratan Imami), thërret dy miqtë e tij Aleks (Gentian Zenelaj) dhe Stefan (Indrit Çobani), për ta ndihmuar të gjejë një mënyrë për të rifituar Sofinë!…Kuptohet që asgjë nuk ndodh sipas planeve të tyre! Në materialin e komedisë publikuar nga teatri më parë, thuhet se vepra si strukturë është një “hibrid” modern midis stand-up comedy dhe komedisë klasike. Tre personazhet, me karakter dhe personalitete të ndryshme trajtojnë e flasin mbi të gjitha temat e marrëdhënieve njerëzore në çift si, tradhtia, ndarja, psikologjia femërore, psikologjia mashkullore, paragjykimet mbi dashurinë, seksin, martesën, maskilizmin, misogjininë, etj. Në jetën artistike si regjisor Artan Imami ka vënë edhe të tjera vepra teatrore premierë në skenë, ku përmendim shfaqjet “Mashtrimi” apo edhe atë me titull “Tango”.