Kompozimet, me fragmente shkrimesh e poezish të autorit Gianni Rodari në TKOB

Mësuesit e Shkollës Jazz të Konservatorit "Carlo Gesualdo da Venosa" të Potenzës do të sjellin kompozimet origjinale, me fragmente shkrimesh e poezish të shkrimtarit, poetit dhe mësuesit të madh e vizionar italian, Gianni Rodari. Teatri Kombëtar i Operës dhe Baletit shprehet se krahas këtyre kompozimeve origjinale, edhe një album i rëndësishëm i kantautorit të njohur, Sergio Endrigo, për të cilin Gianni Rodari është kujdesur për të gjithë pjesën letrare, do të vijë për kënaqësinë e artdashësve të muzikës jazz. “Koncerti do të zhvillohet më 22 nëntor, ora 20:00, në hollin koncertor të Teatrit Kombëtar të Operës dhe Baletit”, thuhet në faqen e institucionit. Xhani Rodari (23 tetor 1920 - 14 prill 1981) ka qenë një shkrimtar dhe gazetar italian, i mirënjohur për librat e tij për fëmijë. Ai fitoi çmimin “Hans Christian Andersen” në vitin 1970 dhe konsiderohet si autori italian më i njohur për fëmijë i shekullit të njëzet. Çmimi “Hans Christian Andersen” për letërsinë për fëmijë i dha atij një reputacion të gjerë ndërkombëtar, si shkrimtari më i mirë modern për fëmijë në italisht. Librat e tij janë përkthyer në shumë gjuhë, madje edhe në gjuhën shqipe, por vetëm pak janë përkthyer në gjuhën angleze. Koncerti që do të zhvillohet nesër në mbrëmje në hollin koncertor të Teatrit Kombëtar të Operës dhe Baletit (TKOB) vjen në vijim dhe të tjera shfaqjeve dhe koncerteve, që janë zhvilluar gjatë këtij sezoni artistik nga ky institucion. Gjatë këtij sezoni artistik në skenë kanë qenë kryevepra botërore, por nuk kanë munguar dhe shfaqje që janë vënë në skenë për fëmijët. Në vijim të kalendarit artistik do të vijohet me të tjera shfaqje për publikun.