Koncerti “Karajfilat që ka Shkodra”, në shkollën “Prenkë Jakova”

Në sallën e koncerteve të shkollës “Prenkë Jakova” u zhvillua koncert-performancë me rastin e festave të nëntorit me titull “Karajfilat që ka Shkodra”. Tradita 40 vjeçare vazhdon dhe në këtë grup sot këndojnë instrumentistë dhe këngëtarë, të cilët kanë përfunduar shkollën “Prenkë Jakova”. Në 60 vite në shkollën “Prenkë Jakova” simbol i muzikës e artit kanë përfunduar studimet mijëra artistë dhe muzikantë. Studiuesi Qamil Gjyrezi foli për aktivitetin e grupit “Karajfilat që ka Shkodra”. Në këtë koncert më 24 nëntor u kënduan këngët “Karajfilat që ka Shkodra”, “U thafsha si thahet fiku”, “S’ka ma të bukur se pranvera”. Në koncert kënduan pjesëtarët e grupit prof. Agron Grami dhe Fatjon Tanazi, Ruzhdi Cekaj këngëtari më i vjetër i grupit dhe këngëtari më i ri Ajdis Hasani. Grupi u shoqërua nga saksofonisti Indrit Kodraliu, klarinetisti Agron Rexha dhe fizarmonicisti Erald Rragami. Në koncert luajtën një këngë të përpunuar shkodrane  Merald Stalbi në piano dhe në trombë Qamil Gjyrezi. Në këtë koncert luajtën edhe nxënës të shkollës “Prenkë Jakova” këngën arbëreshe “Moj e bukura More”, Qamil Gjyrezi trombë, Jozefina Lekaj piano, Luciana Preci kitarë. Në përfundim të koncertit një ansambël muzikor luajti këngën “Çile zemrën plot kujtime” orkestrale e përpunuar, Qamil Gjyrezi trombë, Briken Cara trombë, Erald Rragami fizarmonikë, Anton Guri trombon, Jozefina Lekaj piano, Luciana Preci kitarë. Moderatore e aktivitetit ishte Laura Pjetri. Në këtë aktivitet luajti një pjesë për fizarmonikë nxënësi Visar Alija. Grupi “Karajfilat që ka Shkodra” ka dhënë shfaqjen e parë në vitin 1983. Qëllimi i krijimit të këtij grupi ishte ruajtja e traditës muzikore të qytetit të Shkodrës. Një rol të rëndësishëm ka luajtur për promovimin e këtij grupi ish-drejtuesi i kulturës dhe dashamirës i artistëve Agim Kodraliu. Sot grupi është rikrijuar me instrumentistë dhe profesorë të shkollës “Prenkë Jakova” dhe zhvillon aktivitet për ruajtjen e traditës së Shkodrës.