Koncerti premierë "Strauss & Tchaikovsky: Përtej kufijve të shpirtit njerëzor” në Teatrin Kombëtar të Operës dhe Baletit

Muzika e kompozitorëve Strauss dhe Çajkovksi do të vijë përmes një koncerti simfonik. "Strauss & Tchaikovsky: Përtej kufijve të shpirtit njerëzor” titullohet koncerti premierë, që do të zhvillohet në Teatrin Kombëtar të Operës dhe Baletit. Orkestra Simfonike e TKOB-së, nën dirigjimin e maestros, Jacopo Sipari di Pesscaseroli, dhe në bashkëpunim  me Konservatorin "Umberto Giordano”, të Foggia-s e “Giuseppe Martucci”, të Salerno-s, sjell suitën më të bukur orkestrale të kompozitorit gjerman, Richard Strauss, "Der Bürger als Edelmann", dhe Simfoninë nr. 5 të kompozitorit, P. I. Tchaikovsky. Koncerti që do të jetë premierë mbrëmjen e datës 3 tetor në TKOB, sipas institucionit është dhe në kuadër të aktiviteteve të Javës së Kulturore Gjermane që do të jetë në vendin tonë. “Koncerti simfonik premierë "Strauss & Tchaikovsky: Përtej kufijve të shpirtit njerëzor", vjen më 3 tetor, ora 20:00, në kuadër të Javës Kulturore Gjermane, organizuar nga Ministria e Kulturës, për të gjithë adhuruesit e muzikës gjermane”, thuhet nga Teatri Kombëtar i Operës dhe Baletit ndër të tjera. Java e Kulturës Gjermane do të sjell aktivitete të ndryshme, por ndërkohë që është dhe “Tetori Gjerman”. Që nga viti 2007 në Shqipëri zhvillohen çdo vit javët e kulturës gjermano-shqiptare me emrin "Tetori Gjerman". Edhe këtë vit “Tetori Gjerman” do të jetë me veprimtari të ndryshme. Koncerti që do të zhvillohet në një nga mbrëmjet e para të muajit tetor vjen në vijim dhe të tjerë koncerteve, që janë zhvilluar gjatë sezonit artistik më parë. Orkestra Simfonike e TKOB ka dhënë dhe vijon të japë një kontribut të çmuar në ekzekutimin e veprave të kompozitorëve shqiptar dhe atyre botërorë.

Strauss dhe Çajkovski

Në historinë e muzikës botërore, Richard Strauss mbeti një kompozitor i shkëlqyer, dirigjent virtuoz, autor i operave dhe poezive simfonike. Në kujtim të tij u organizua dhe Festivali i Muzikës Klasike “Richard Strauss”. Kompozitori gjerman Richard Georg Strauss u lind më 11 qershor 1864 në München, dhe jetoi deri më 8 shtator 1949 Garmisch-Partenkirchen. I konsideruar si një kompozitor kryesor i epokave të fundit romantike dhe të hershme moderne, ai është përshkruar si pasardhës i Richard Wagner dhe Franz Liszt.  P. I. Tchaikovsky ( 7 maj 1840 -6 nëntor 1893), ishte një kompozitor i madh rus i erës romantike si edhe dirigjent dhe pedagog. Muzika e tij njihet dhe pëlqehet edhe për harmoninë e pasur dhe meloditë energjike. Veprat e tij kanë një frymëzim më perëndimor se bashkëkohësit e tij, ato mishërojnë elemente ndërkombëtare të gërshetuara me meloditë popullore kombëtare. Çajkovski jetoi dhe krijoi në të njëjtën periudhë kur jetuan dhe krijuan veprat e tyre "Grupi i të pestëve", por orientimi ideo-estetik i këtij kompozitori dallohet nga programi ideor i "Grupit të fuqishëm". Çajkovski u mbështet krijimtarinë e tij në traditat e klasikëve dhe të romantikëve të Evropës Perëndimore e në radhë të parë të kompozitorëve gjermanë e francezë.