BREAKING NEWS

“FBI”-ja shqiptare nis punën më 1 shtator, zbardhen detajet ku do të jetë selia

“FBI”-ja shqiptare nis punën më 1 shtator, zbardhen
x

Kultura

Konferenca për 100 vjetorin e lindjes së Arshi Pipës, studiuesit: Vazhdon censura ndaj tij

Konferenca për 100 vjetorin e lindjes së Arshi Pipës, studiuesit:

Me rastin e 100-vjetorit të lindjes së Arshi Pipës, Qendra Kombëtare e Librit dhe Leximit kujtoi veprën duke bërë bashkë në një takim studiues dhe njohës të figurës së tij. Në konferencën në hapësirat e Qendrës Kombëtare të Librit dhe Leximit referuan njohës të veprës së tij, si dr. Primo Shllaku, dr. Leka Ndoja, profesori Hektor Çiftja, botuesja e “Princit” Irena Buzi, si dhe studiuesja Luljeta Prençi. Takimi u përshëndet edhe nga nipi i Arshi Pipës, Plator Kalakula, që ndau me të pranishmit momente të jetës së Pipës. Alda Bardhyli, drejtoreshë e Qendrës së Librit dhe Leximit në fjalën e saj çmoi figurën e Pipës dhe mendimin e tij kritik në periudhën e soc-realizmit. “Arshi Pipa krijoi një shkollë të mendimit dhe kritikës letrare, por ajo që shihet si vlerë e Pipës është fakti që krijoi një lloj tjetër modeli të kritikës letrare në kushtet e soc-realizmit. Kemi dy lloj kritikash, një mënyrë sesi kritika i shikonte veprat e asaj periudhe dhe tjetra ishte mënyra se si Pipa, një autor që vinte nga një botë e lirë e pa dhe e studioi letërsinë shqipe”, tha Bardhyli. Në fjalën e tij studiuesi Primo Shllaku u shpreh se sheh ende një censurë ndaj figurës së Pipës. “Arshi Pipa është i vonuar dhe vazhdon një censurë ndaj tij. Ai ka trazuar traditën e re dhe të vjetër të kritikës dhe studimeve shqiptare”, tha studiuesi Shllaku. Botuesja Irena Buzi në këtë takim vlerësoi figurën e Pipës si një kritik i rrallë i letrave shqipe, dhe kujton një të veçantë të tij që janë shkrimet nëpër letra cigareje. “Një vepër monumentale ishte libri i tij në një ekspozitë arti. Një ngjarje të atillë të kujton se si Jul Cezari do kalonte nga një breg në një breg tjetër. Me një dorë mbante letrën e shkruar dhe me një dorë bënte notin vetëm për mos ta lagur letrën ose si veprat e arta ku është shkruar Epi i Gilgameshit. Pipa për mua ka qenë një model i jashtëzakonshëm, që më ka edukuar si studiues dhe si kritik arti, si filozof dhe si poet”, u shpreh botuesja. Të tjerë studiues që çmuan figurën e Pipës ishin Luljeta Prenci dhe Hektor Çiftja. Së shpejti do të vijë në libër "Letërkëmbimi CAMAJ-PIPA, 1959-1992". Vepra përmban një letërkëmbim gati gjysmëshekullor mes dy prej personaliteteve më të shquara e më ndikuese në letrat shqipe në diasporën antikomuniste shqiptare si dhe në jetën publike të këtyre viteve demokraci: Arshi Pipës dhe Martin Camajt. Arshi Pipa lindi më 28 korrik të 1920 në Shkodër dhe u nda nga jeta më 20 korrik 1997 në Washington.