Konferencë shkencore kushtuar Jakov Xoxës, në ASH shfaqet dhe dokumentari për jetën dhe veprën

Akademikë dhe studiues në konferencën shkencore kushtuar Jakov Xoxës vlerësuan kontributin e shkrimtarit. Akademia e Shkencave organizoi konferencën në përkujtim të 100-vjetorit të lindjes së shkrimtarit dhe studiuesit Jakov Xoxa, në zbatim të vendimit të asamblesë së saj, e cila e ka veçuar këtë figurë të letrave shqipe si personalitetin e vitit. Kryetar i ASH akademik Skënder Gjinushi tha se vepra e veprimtaria e Jakov Xoxës janë bazale në historinë e letërsisë shqipe të gjysmës së dytë të shek. XX. “Triptiku i tij, me romanet Lumi i vdekur, Juga e bardhë e Lulja e kripës, është bërë pjesë e konstitucionit shpirtëror të dhjetëra brezave në Shqipëri e Kosovë, madje dhe për lexuesit në gjuhë të huaj. Gjurma që ka lënë kjo vepër në formimin artistik e botëkuptimor të rinisë shqiptare është e pashlyeshme. Proza e Jakov Xoxës: romanet dhe novelat, tregimet dhe shkrimet publicistike të tij, janë një trashëgimi origjinale me shumë vlerë, që i përkasin dhe i bëjnë nder jo vetëm emrit të autorit, por vetë fatit të letërsisë shqipe në dekadat e pasluftës”, tha Gjinushi. Më tej akademik Gjinushi tha se duke e cilësuar romanin “Lumi i vdekur” si ndër romanet më të mirët të letërsisë shqipe deri më sot, akad. Rexhep Qosja shprehej se Jakov Xoxa është shkrimtari i parë shqiptar që tenton të zbulojë njeriun dhe realitetin në tërësinë e tyre. “Vepra e Jakov Xoxës ka një rëndësi historike për rolin që pati si përbashkuese e vetvetishme e lexuesit shqiptar kudo që ndodhej”, tha Gjinushi. Kryetari i ASH akad. Skënder Gjinushi i dha çmimin e mirënjohjes më të lartë, Nderi i Akademisë, Jakov Xoxës. Çmimi iu dorëzua të birit Agron Xoxës. Gjatë zhvillimit ë konferencës shkencore ndërkombëtare u shfaq dhe dokumentari "Jakov Xoxa - 100 vjet", kushtuar jetës dhe veprës së shkrimtarit Jakov Xoxa, prodhim i RTSH, vepër e regjisorit Ylli Pepo. Jakov Xoxa lindi në Fier, më 15 prill 1923 dhe u nda nga jeta në Budapest, 28 prill 1979.