Kuvendi “Trashëgimia kulturore arbëreshe. Vepra e Jeronim De Radës dhe Anselmo Lorecchio-s” në ditën e arbëreshëve

Në ditën kushtuar arbëreshëve, sipari i aktiviteteve u çel me kuvendin “Trashëgimia kulturore arbëreshe. Vepra e Jeronim De Radës dhe Anselmo Lorecchio-s”, që u mbajt në Universitetin Politeknik. Ky kuvend më 6 qershor, ku ishin të pranishëm disa studiues të fushës u zhvillua nën moderimin e prof. Diana Kastratit, nga Qendra e Studimeve dhe Publikimeve për Arbëreshët (QSPA). Kuvendi u çel me fjalën përshëndetëse të zv. ministres së Kulturës znj. Meri Kumbe, e cila theksoi rëndësinë e kësaj ditë për vendin tonë. Sipas programit të Kuvendit “Trashëgimia kulturore arbëreshe. Vepra e Jeronim De Radës dhe Anselmo Lorecchio-s” fjalën i pari e mori prof. Matteo Mandalà, përgjegjës i departamentit të Gjuhës Shqipe në Universitetin e Palermos. prof. Mandala vuri në dukje projektet e realizuara nga departamenti ku theksoi rëndësinë e projektit “Besa”. Në vijim fjalën e mori prof. Francesco Altimari, përgjegjës i departamentit të Gjuhës Shqipe në Universitetin e Kalabrisë, i cili theksoi rëndësinë e ruajtjes së të shkuarës për hir të komuniteteve, por pa e ngrirë atë por duke ndërtuar të ardhmen, përmes konservimit të së shkuarës. Në kumtesën e tij prof. Shezai Rrokaj theksoi rolin e historisë, gjenetikës dhe traditës në konceptin shqiptarisë i cili shpërfaqet në gjuhë e kultura të vendeve të ndryshme. Ai u ndal në rolin e arbëresheve si simbol i shqiptarisë. Prof. Ymer Çiraku trajtoi rolin e De Radës në letërsinë shqipe dhe trajtesën që i ka bërë shkrimtari Ismail Kadare kësaj figure. Në vijim të kumtesave dr. Silvana Nini foli për kostumografinë arbëreshe si një pasqyrën më të denjë të kulturës arbëreshe. dr. Jolanda Lila trajtoi pikëtakimet mes Jeronim De Radës dhe Anselmo Lorekio-s. Ajo vuri në dukje, se Lorekio e konsideron De Radën mjeshtër të lëvizjes kombëtare shqiptare, ku dishepulli i tij më i denjë ishte vetë Lorekio. Ndër të tjera në fund të këtij kuvendi, prof. Kastrati theksoi rolin dhe kontributin e arbëreshëve në pavarësinë e Shqipërisë, të theksuar në një letër nga Ismail Qemali. Në përmbyllje ajo shprehu gjithë gatishmërinë e QSPA-së për bashkëpunime me të gjitha institucionet dhe organizatat aktive me fokus arbëreshët, që veprojnë në Itali dhe në Shqipëri.