“Luba” me një histori tragjike dashuria në skenën e Teatrit Eksperimental

Vepra “Luba” vjen në skenën e Teatrit Kombëtar Eksperimental “Kujtim Spahivgoli”. Shkruar nga autori Ylljet Aliçka vepra është me regji nga Armand Bora. Shfaqja teatrore “Luba” rikthehet në skenën e Tiranës, pasi u shfaq më parë në teatrin “Aleksandër Moisiu” në qytetin e Durrësit. Me regji nga Armand Bora, “Luba” është një histori tragjike dashurie. Vepra do të jetë në skenën e Teatrit Eksperimental mbrëmjet e datave 17 dhe 18 mars. Produksion privat që luhet në skenë nga aktorët Xhoana Karaj, Kristian Koroveshi, Igli Fusha, Livion Aliaj, Klaudio Gega, Eno Basha. Koreografe Veroniki Chatzopoulou, kompozitor Enis Mullaj, as/regjisor Astiano Shehaj. Luba është historia tragjike e një gruaje të huaj, martuar me një shqiptar. Ngjarje dhe histori të viteve ‘60-‘70 vijnë në skenë përmes parodizimit të sistemit diktatorial dhe shpërfaqjes së thelbit të tij kriminal. Më herët regjisori Armand Bora ka treguar se shoqëria jonë ka ende detyrim ndaj personave që vuajtën në diktaturë. "Kënaqësia për vënien e kësaj shfaqje, është e dyfishtë, qoftë për sprovën e vënies së një forme të re teatrore, edhe për sa i përket faktit që iu rikthehemi këtyre temave, sepse ne si shoqëri kemi detyrim akoma ndaj këtyre personave, që vuajtën dhe e paguan shtrenjtë atë sistem, dhe për më tepër kur janë edhe të huaj, siç është rasti i Lubës. Këto gra, erdhën në Shqipëri duke ëndërruar parajsën dhe gjetën ferrin. Në këtë rast shoqëria ka detyrim, që minimalisht t'i kujtojë me një shfaqje”, shprehet regjisori Bora. “Luba" është një playbacktheater për herë të parë në skenën shqiptare. I krijuar për herë të parë në vitin 1975 në Amerikë, nga Jonathan Fox dhe Jo Salas, playbacktheater është një teatër i ndërtuar mbi interaktivitetin me spektatorët. Shfaqja teatrore “Luba” është në vijim të aktivitetit të Armand Borës si regjisor në teatër.