Margariti: Abigeila Voshtina të jetë në lartësinë e duhur për të ngritur cilësinë artistike të teatrit

Abigeila Voshtina do të drejtorë Teatrin Kombëtar të Operës, Baletit dhe Ansamblit Popullor pas Zana Çelës. Voshtina u emërua në këtë detyrë disa ditë më parë me vendim të Këshillit të Ministrave. Ministrja e Kulturës Elva Margariti shprehet në një status të saj në Facebook, se Voshtina të punojë që të çojë më tej cilësinë artistike të teatrit. “Suksese Abigeila Voshtina në sfidën e drejtimit të Teatrit Kombëtar të Operës dhe Baletit, këtij institucioni unik në Shqipëri. Urojmë që Abigeila, në krye të një stafi energjik e të talentuar, të çojë më tej punën e bërë deri më tani nga parardhësit dhe të jetë në lartësinë e detyrës, për të ngritur cilësinë artistike të teatrit; ta bëjë ftues për publikun e ri dhe një skenë të denjë për yje shqiptarë e ndërkombëtarë”, shkruan Margariti. Shtatë kandidatët për drejtimin e TKOBAP ishin Zana Çela, Josif Gjipali, Adela Muçollari, Abigeila Voshtina, Kleanthi Gjika, Tomorr Kokona  dhe Arben Skënderi. Abigeila Voshtina në prezantimin e programit të saj i ka mëshuar ndër të tjera mungesës së një sezoni dy-vjeçar të Operas, si dhe bashkëpunimit edhe me Bashkinë e Tiranës. Më parë Abigeila Voshtina ka qenë drejtoreshë artistike e TKOB. Komisioni për vlerësimin e shtatë kandidatëve i ngritur me urdhër të ministres së Kulturës Elva Margariti, që mbante datën 23. 5. 2022 përbëhej nga Meri Kumbe zëvendës ministre e Kulturës kryetare, si dhe anëtarë Elira Dani dhe Arian Avrazi drejtorë në ministri të Kulturës, Luigi Ferrari artist dhe ekspert i jashtëm dhe Gintautas Kevisas artist ekspert i jashtëm. Teatri Kombëtar i Operas, Baletit dhe Ansamblit Popullor është tempulli i artit skenik, muzikor dhe baletit, i vetmi institucion kombëtar i këtij lloji në vendin tonë. TKOBAP është institucioni i krijimit, prodhimit dhe interpretimit të repertorit më të mirë skenik gjithëpërfshirës, kombëtar e ndërkombëtar.