Marrëdhëniet shqiptaro-amerikane gjatë shekullit XX, studiues shqiptarë dhe të huaj në konferencë shkencore

Konferenca shkencore për marrëdhëniet mes Shteteve të Bashkuara të Amerikës dhe Shqipërisë gjatë shek. XX, organizuar nga Instituti i Historisë (Akademia e Studimeve Albanologjike), me mbështetjen e Ambasadës Amerikanë në Tiranë bëri bashkë studiuesit. Akademia e Studimeve Albanologjike shprehet se konferenca “Marrëdhëniet shqiptaro-amerikane gjatë shek.XX” bashkoi gjenerata studiuesish me qasje të ndryshme. “Edhe pse 100-vjeçare në moshë, kjo marrëdhënie nuk është konsumuar e plotë në kohë për shkak të ndeshtrashave të historisë moderne të Shqipërisë, me pushtimet gjatë Luftës së Dytë Botërore dhe sidomos me “ngrirjen e thellë” në mes gjatë komunizmit. Shqipëria mbeti i vetmi vend i Lindjes komuniste në Europë, me të cilin SHBA-të nuk patën marrëdhënie, me gjithë përpjekjet e Departamentit Amerikan të Shtetit gjatë viteve ’70. Konferenca bashkoi disa gjenerata studiuesish me qasje të ndryshme në perceptimin e fenomeneve historike për këtë epokë”, shprehet ASA në faqen e saj. Akademia e Studimeve Albanologjike vijon më tej se studiuesit shqiptarë (Afrim Krasniqi, Hamit Kaba, Valentina Duka, Beqir Meta, Ledia Dushku, Pranvera Teli, Artan Hoxha, Edon Qesari, Migena Leskoviku) dhe ata amerikanë (Janusz Bugajski, Bernd Fischer, Elidor Mëhilli) përmes burimeve të njohura e të panjohura dhanë një panoramë retrospektive të atyre që kanë qenë marrëdhëniet shqiptaro-amerikane. “Ata vunë në dukje edhe nevojën e perspektivave të reja në qasjet ndaj këtyre raporteve, qoftë në të shkuarën e largët, qoftë në epokën bashkëkohore, kur roli i SHBA-ve mbetet faktor i rëndësishëm për vijimin e reformave demokratike dhe ndërtimin e shtetit të të drejtës në Shqipëri”, thuhet nga Akademia e Studimeve Albanologjike. Konferencën që u zhvillu një ditë më parë e përshëndeti Yuri Kim, Ambasadore e SHBA-ve në Republikën e Shqipërisë. ASA bën me dije se në muajt e ardhshëm, ligjëratat e studiuesve do të botohen të plota shqip-anglisht.