Marrëveshja për Butrintin, arkeologu Apollon Baçe: Nuk ka ndodhur ndonjëherë që një ligj të bëhet në porosi të një fondacioni, parkun po ua japim të tjerëve

Arkeologë, aktivistë, etj, protestuan dje kundër marrëveshjes për administrimin e parkut kombëtar të Butrintit. Përballë parlamentit ata kërkuan, që të anulohet projektligji i marrëveshjes për menaxhimin e parkut të Butrintit. Ata u shprehën se specialistët nuk janë pyetur në lidhje me këtë çështje dhe se ligji favorizon një fondacion të caktuar. Arkeologu Apollon Baçe tha se nuk mund të shitet shpirti i kombit për një sasi lekësh. “Butrinti sot jep 2.1 milionë euro edhe thuhet që do futen 6 milionë, ku do vejnë këto?! Janë lekë që do përdoren për bare dhe restorante. E bukura është që 1/3 duhet ta paguajë populli”, tha arkeologu Baçe, i cili dhe më parë ka dalë kundër kësaj marrëveshje për parkun e Butrintit. Sipas tij, ky plan që po mendohet për parkun kombëtar është qesharak. Akademiku dhe arkeologu Apollon Baçe thotë se përfitimi do ti kalojë fondacionit. “Nuk ka ndodhur ndonjëherë tjetër, që një ligj të bëhet në porosi të një fondacioni të caktuar. Këtu do kemi një përfitim që do ti kalojnë komplet fondacionit amerikan. Nuk ka të bëjë shteti shqiptar, por nëpërmjet një fondacioni, në krye të të cilit është një anti-shqiptar. Plani i këtyre është plani më qesharak. Ato lekët që do të futen janë tamam lekë për baret”, tha arkeologu Apolon Baçe, pjesë e Aleancës për Mbrojtjen e Butrintit, që u krijua më parë nga një grup veprimtarësh, studiuesish dhe ekspertësh të historisë dhe arkeologjisë.  

Rëndësia e parkut kombëtar

Për rëndësinë që ka parku kombëtar i Butrintit, akademiku dhe arkeologu Apollon Baçe tha se është shpirti i kombit, i historisë sonë. “Njëherë që më kanë pyetur kam thënë edhe se është qyteti antik më i bukur në botë. Më të bukur se Butrinti nuk ka më. Është një perlë. Pse ne këtë t’ia japim të tjerëve? Për mua është e paimagjinueshme, parlamenti tek ne është shumë i habitshëm”, tha arkeologu Apollon Baçe. Për arkeologun Baçe kjo që po ndodh me parkun e Butrintit është skandal dhe në kundërshtim me ligjet. Sipas tij ministrja e Kulturës Elva Margariti është një vegël, që përdoret për të thënë ato që duhet të thotë. “Ministrja përgjegjësia e një vegle që ka bërë gjithçka. Giora Solar që është numri një në botë thotë se nuk ka ndodhur ndonjë herë tjetër dhe fondacioni të jetë ai që do të përfitojë nga ky ligj”, vijoi me tej arkeologu, duke shtuar se në Butrint nuk duhet të ketë ndërtime. Fondacioni për menaxhimin e Butrintit krijohet në partneritet me Fondacionin jo shtetëror Shqiptaro-Amerikan për Zhvillim (AADF) dhe do të përbëhet nga 5 anëtarë, 2 prej të cilëve nga Ministria e Kulturës, 2 të tjerë nga partneri strategjik AADF, ndërsa një i pestë është arkeologu i huaj britanik Richard Hodges. Kontributi fillestar financiar i partnerit strategjik është 5 milionë dollarë, ndërsa ai i Ministrisë së Kulturës 2 milionë dollarë. Parku kombëtar i Butrintit është një nga zonat më të rëndësishme të trashëgimisë sonë kulturore, arkeologjike, mjedisore dhe turistike të vendit. Zemra e parkut kombëtar është qyteti antik i Butrintit, ekzistenca e të cilit vazhdoi pa ndërprerje, që prej periudhës së prehistorisë e deri në mesjetë, duke ofruar kështu një shumëllojshmëri kulturash dhe periudhash historike.