Mbrëmja poetike “Kadare në vargje” në 87-vjetorin e shkrimtarit

“Kadare në vargje” bëri bashkë njerëz të kulturës e politikës në 87-vjetorin e shkrimtarit të madh shqiptar. Në 87-vjetorin e lindjes së gjeniut të letrave, Ismail Kadaresë, Qendra Kombëtare e Librit dhe Leximit dhe Akademia e Shkencave organizuan mbrëmje poetike me muzikë e vargjet e shkrimtarit në hollin e Universitetit të Arteve. Një mbrëmje interpretimesh nga aktorët Rajmonda Bulku, Kastriot Çaushi dhe Kristian Koroveshi. Shkrimtari Ismail Kadare ishte i pranishëm bashkë me bashkëshorten e tij Helena Kadare. Kjo mbrëmje poetike erdhi si një shenjë mirënjohje për Kadarenë, që përmes letërsisë u rendit mes autorëve më të shquar. “Shkrimtari një ëndërr ka, një mendim, një gjë e ndjek hap pas hapi ajo që ka shkruar apo që mund të shkruante më mirë. Ose, e ka shkruar shumë mirë, por... pavarësisht se mund t’ia lëvdojnë shumë, ai e di vetë”, u shpreh Kadare. Ndërsa për Helena Kadarenë mbrëmja poetike ishte me interpretues të mrekullueshëm. “Vargjet e Ismailit padyshim që janë më të preferuarat e mia, por edhe interpretuesit ishin të mrekullueshëm”, u shpreh ajo. Në këtë veprimtari përshëndeti në emër të kryesisë së Akademisë së Shkencave, akad. Vasil S. Tole. Në këtë mbrëmje që u zhvillua të shtunën, akademiku Vasil Tole tha se Kadareja është shkrimtari që na ka dhënë liri për dekada me radhë në një kohë kontrolli të përgjithshëm. “Krijimtaria juaj ishte dhe mbetet “buka” jonë shpirtërore, e cila ushqente dhe ushqen imagjinatën, shtynte dhe shtyn, zgjeronte dhe riformatonte përmasat e munguara të lirisë individuale, dhe me universalitetin e saj është letërsi për çdo qenie njerëzore anembanë botës. Çfarë mund të kërkosh më shumë prej saj! Ismail Kadare shkroi një vepër unike me të cilën krijoi një Shqipëri europiane”, tha akademiku Tole ndër të tjera. Ismail Kadare është poet e prozator dhe një nga përfaqësuesit më të shquar të letërsisë shqiptare. Ai është një ndër personalitet qendrore të kulturës shqiptare të gjysmës së dytë të shek. XX. Ismail Kadare lindi në vitin 1936 në Gjirokastër.