Çmimet Kombëtare të Letërsisë, QKLL shpall kandidaturat për përkthimin

Dhjetori është muaji ku shpallen Çmimet Kombëtare të Letërsisë. Qendra Kombëtare e Librit dhe Leximit një ditë parë shpalli dhe kandidaturat për përkthimin. Albert Camus “Njeriu i parë”, përktheu Saverina Pasho; grup autorësh “Antologji e poezisë bashkëkohore greke”, përktheu Sokol Çunga; Herta Muller “Teposhtë”, përktheu Anna Kove; Hilary Mantel “Pasqyra dhe drita”, përktheu Korab Hoxha; Roberto Arlt “Shtatë të çmendurit”, përktheu Erion Karabolli janë kandidaturat sipas QKLL. Çmimet Kombëtare të Letërsisë janë nën mbështetjen e Ministrisë së Kulturës. Të kthyera tashmë në traditë, për letërsinë shqipe, juria, e zgjedhur për gjykimin e veprave të një viti kalendarik, ka nisur punën që në janar të këtij viti, për të mbërritur në fund të këtij muaji me vlerësimet për veprat më të mira në gjashtë kategori për vitin 2021: Çmimi “Romani më i mirë i vitit”; çmimi “Vëllimi më i mirë poetik i vitit”; çmimi “Vëllimi më i mirë me tregime i vitit”; çmimi “Vepra më e mirë studimore letrare e vitit"; çmimi “Përkthimi më i mirë i vitit”; çmimi “Libri për fëmijë më i mirë i vitit”. Juria, e kryesuar nga akademike Floresha Dado, me anëtarë shkrimtarin Virion Graçi, akademikun Kujtim Shala, zv.dekanen e Fakultetit të Historisë dhe Filologjisë, UT, Elsa Skënderi Rakipllari dhe dekanen e Fakultetit të Gjuhëve të Huaja, UT, Esmeralda Kromidha, do të bëjnë me dije më 5 dhjetor, 5 finalistët për çmimin e madh, për gjashtë kategoritë e mësipërme. Në një aktivitet gala, me pjesëmarrjen e aktorëve Viktor Zhusti, Luiza Xhuvani dhe Vasjan Lami, Ministria e Kulturës dhe Qendra Kombëtare e Librit dhe Leximit ndanë një vit më parë Çmimet Kombëtare të Letërsisë, për vitin 2020, për veprat më të mira në gjininë e prozës, poezisë, librit studimor, librit për fëmijë dhe përkthimit.