Ministria e Kulturës hap garën për drejtor në Teatrin Eksperimental, deri më 16 dhjetor dorëzimi i dokumenteve

Ministria e Kulturës ka hapur garën për drejtor në Teatrin Kombëtar Eksperimental “Kujtim Spahivgoli”. Ministria e hap këtë garë pas dorëheqjes së Altin Bashës nga Teatri Eksperimental, i cili kandidon për postin e drejtorit të Teatrit Kombëtar. Në faqen zyrtare të ministrisë thuhet se afati për dorëzimin e dokumenteve është deri në datën 16 dhjetor. “Në zbatim të Ligjit 10352, datë 18.11.2010 “Për artin dhe kulturën”, i ndryshuar, si dhe kërkesave të procedurës së përcaktuar në Vendimin e Këshillit të Ministrave nr. 173, datë 07.03.2003 “Për emërimin, lirimin ose shkarkimin nga detyra të drejtuesve të institucioneve, në varësi të Këshillit të Ministrave, Kryeministrit ose Ministrit”, Ministria e Kulturës shpall konkursin për pozicionin: Drejtor në Teatrin Kombëtar Eksperimental “Kujtim Spahivogli” - Kategoria e pagës II-b. Afati për dorëzimin e dokumenteve pranë Zyrës së Protokollit,  në Ministrinë e Kulturës deri në datë 16. 12.2022”, thuhet në njoftimin e MK. Njoftimi për konkursin mban datën 30 nëntor dhe sipas MK kandidatët duhet të plotësojnë kërkesat e posaçme si: Të ketë mbaruar arsimin e lartë në degët e artit, menaxhimit të artit kulturor; Të ketë të paktën 3 vite përvojë pune në profesion dhe/apo përvojë të konsiderueshme në drejtim, menaxhim dhe krijimtari në fushën e artit skenik, si dhe në drejtimin e projekteve kulturore; Të njohë problemet aktuale dhe sfidat e teatrit shqiptar me qëllim reformimin e tij përkrah modeleve më të mira bashkëkohore. Gjithashtu të ketë përvojë në ndërtimin dhe mbajtjen e marrëdhënieve me donatorë dhe grupe të tjera interesi, si dhe në ngritjen e fondeve prej burimeve të ndryshme -si të sektorit publik ashtu dhe privat dhe t’i dëshmojë ato; Të ketë aftësi të dallueshme komunikimi në ruajtje dhe zhvillim të kontakteve brenda dhe jashtë institucionit si dhe me partnerët vendorë e ndërkombëtarë; Të ketë përvojë me teatrin e të rinjve dhe në programet e edukimit përmes kulturës si dhe të zotërojë shumë mirë gjuhën angleze, gjuhë të tjera të huaja përbëjnë avantazh.