Ministria e Kulturës shtyn afatin e konkursit ndërkombëtar për muzeun “Besa”

Muzeu “Besa” një institucion sa kujtese aq edhe dialogu. Ministria e Kulturës hapi më 13 shkurt konkursin ndërkombëtar për hartimin e projektit të muzeut “Besa”, por dje ministrja Elva Margariti njoftoi se është shtyrë afati i dorëzimit të dokumenteve për ata që duan të marrin pjesë në konkurs. Ministrja Margariti shton gjithashtu se muzeu “Besa” ka pasur jehonë dhe në median e huaj. “Kemi ndërmarrë një nismë të re, që na prek të gjithëve: ngritjen e muzeut "Besa", një institucion sa kujtese aq edhe dialogu. Në datën 13 shkurt 2023 hapëm konkursin ndërkombëtar për hartimin e projektit të këtij muzeu që do të vendoset në zemër të Tiranës. Për shkak të kërkesave të shumta, afati i dorëzimit të fazës së parë, shtyhet! Afati i ri i fazës I: 20 mars (17:00). Jemi me të vërtetë të lumtur për jehonën që ka gjetur ky lajm edhe në median ndërkombëtare”, shprehet ministrja e Kulturës në rrjete sociale. Muzeu do të ngrihet në godinën e njohur si Shtëpia e Libohovitëve, monument kulture, që ndodhet në krah të Kalasë së Tiranës dhe Sarajeve të Toptanëve. Qëllimi i konkursit ndërkombëtar që u hap nga Ministria e Kulturës është të përftohen koncepte bashkëkohore dhe vizionare për ndërhyrje të karakterit arkitekturor dhe restaurues për rehabilitimin dhe adaptimin e objektit ekzistues me status "monument kulture", kategoria I, si dhe ndërhyrje rijetësuese, të cilat synojnë krijimin e një hapësire të re kulturore të shtuar në kryeqytet. Konkursi ndërkombëtar për projektin e muzeut "Besa" i hap udhë krijimit të një destinacioni të historisë së lavdishme të shpëtimit të hebrenjve gjatë Luftës së Dytë Botërore, si edhe të historisë, traditës, kulturës dhe artit hebraik. Ndërhyrjet në këtë objekt do të zhvillohen në tre linja/kategori: Ndërhyrje restauruese; Ndërhyrje rijetësuese/ Funksione të reja; Muzealizim.