Muzeu Etnografik në Berat, dëshmi e kulturës dhe traditës

Muzeu Etnografik në Berat ka një koleksion të pasur prej 1300 objektesh, dhe është dëshmi e rëndësishme e kulturës, traditës interesante e të pasur të kësaj treve. Qendra Muzeore Berat herë pas here publikon materiale për objektet që janë në këtë muze Etnografik, i cili ka një koleksion shumë të pasur. Në katin përdhes të muzeut një rrugicë e improvizuar e pazarit mesjetar, paraqet nëpërmjet objekteve të ekspozuar zeje përfaqësuese dhe më të zhvilluara të trevës; qëndistarinë, argjendarinë, punimin e bakrit dhe veshje e zbukurime që flasin për nivelin aristokratik të jetës së shtresave të mesme e të pasura qytetare. Në pjesën e hapur të hajatit janë prezantuar zeje, që ushtroheshin në kushtet e shtëpisë për nevoja familjare. Hajati lidhet në mënyrë të natyrshme me pusin dhe oborrin ku janë të ekspozuar objekte gurgdhendjeje dhe qeramike. Në katin e sipërm në mjediset e dhomave të banesës paraqitet mënyrën e jetesës, organizimi, traditat e zakonet në një familje qytetare të pasur në Mesjetën e Vonë. Pazari mesjetar në muze është me imitimin e një rrugice në të dyja anët e së cilës gjenden dyqane të vogla prej druri me qepena, ku prodhoheshin, ekspozoheshin e shiteshin artikuj të ndryshëm si: tekstile të qëndisura me ar e argjend, aksesorë për gra e burra argjend e bronz, kostume prej shajaku, këpucë e punime bakri.  Çardaku është mjedisi kryesor i banesës beratase, tërësisht, i konstruktuar me dru,i hapur e pa tavan. Strehët e gjera e të dala krijojnë lehtësi në kryerjen e aktivitetit familjar e artizanal në muajt e ngrohtë të vitit. Qoshku është element i veçantë dhe i preferuar i çardakut. Hapësira e madhe, mundësitë për të pushuar dhe soditje bënin çardakun mjedisin më të frekuentuar nga familjarë në të cilin zhvilloheshin edhe festat familjare. Oda e miqve në muze është mjedisi më i rëndësishëm në banesën tradicionale e vlerësuar për elementët arkitektonike e dekorativë i destinuar për nderimin e miqve, dhe zhvillimin e ceremonive familjare. Bie në sy eleganca e oxhakut, dollapët e murit,tavani i zbukuruar, kompleksi musëndër-mafil, minderet me velenxa, qilima dhe servisi i ushqimit ne qendër. Në dhomën e punës në muze janë ekspozuara tezgjahët dhe objekte pune për endjen e tekstileve, etj.