Muzeu Etnografik në Kavajë, në restaurim falë programit “EU4Culture”

Muzeu Etnografik i Kavajës po i nënshtrohet restaurimit të godinës, ku objektet pritet të kenë një ekspozim më të përshtatshëm. Ministrja e Kulturës Elva Margariti inspektoi punimet në këtë muze. Margariti shprehet se punimet e restaurimit po zhvillohen falë programit “EU4Culture”. “Muzeu Etnografik i Kavajës, zemra e këtij qyteti po i nënshtrohet restaurimit dhe rijetësimit falë programit “EU4Culture”. Së bashku me zv. shefin e Seksionit Politik të Delegacionit të Bashkimit Europian në Shqipëri, Jean-Baptiste Le Bras e përfaqësues të UNOPS, inspektuam nga afër punimet që do ta kthejnë këtë objekt në një muze që do t'u flasë brezave jo vetëm me artefakte, por edhe me gjuhën e teknologjisë”, shprehet ministrja e Kulturës në një status të saj në Facebook. Muzeu Etnografik i Kavajës ndodhet në një banesë ndërtuar në vitin 1800 nga familja Arkaxhi dhe e shndërruar në muze në 1971. Më herët u bë me dije se muzeu mban rreth 810 objekte të tipologjive të ndryshme, që përfaqësojnë stilin e jetesës së Kavajës dhe krahinave përreth. Muzeu Etnografik në Kavajë është planifikuar të ruajë funksionin si muze duke ruajtur rolin e tij si një pol interesi si për banorët, ashtu edhe për turistët që kalojnë kohën në zonat e plazhit të kësaj bashkie dhe bashkive fqinje. Ndërhyrjet e propozuara në lidhje me projektin “EU4Culture” përfshijnë: stabilizimi strukturor i muraturës prej qerpiçi të dëmtuar rëndë; ruajtje e plotë e sipërfaqeve të jashtme, të brendshme dhe çatisë; dokumentimi dhe projektimi i bazës së ruajtjes për të gjitha mobiliet, instrumentet dhe pëlhurat; projektimi i kutive dhe platformave të ekspozitës sipas dizajnit bashkëkohor të muzeut; menaxhimi i riskut nga fatkeqësitë; programi dhe planet e mirëmbajtjes dhe të tjera që kanë lidhje me muzeun, etj. Muzeu Etnografik në Kavajë është shpallur monument kulture i kategorisë së parë.