Muzeu Etnografik në Krujë, Margariti: Ka nevojë për disa ndërhyrje

Muzeu Etnografik në Krujë ka nevojë për disa ndërhyrje. Muzeu do të restaurohet përmes “EU4Culture” dhe është një tjetër objekte i përfshirë në këtë program. Ministrja e Kulturës Elva Margariti shprehet se këto ndërhyrje që do të bëhen në këtë muze do të sjellin përmirësim të artefakteve, etj. “I pozicionuar në zemër të kalasë së Krujës, muzeu Etnografik është një tjetër objekt i trashëgimisë kulturore, që do të restaurohet nga programi “EU4Culture”. Muzeu ka nevojë për disa ndërhyrje në dysheme, tavan, çati, dyer e dritare, por edhe në ndriçim, survejim, mbrojtje nga zjarri, përmirësim të ekspozimit të artefakteve etj. Ndërkohë që mobiljet dhe pikturat murale të shekullit XVIII do të pastrohen dhe forcohen”, shprehet ministrja e Kulturës Elva Margariti në një status të saj në Facebook. Në vendin tonë përmes programit “EU4Culture” të Bashkimit Europian po restaurohen dhe të tjera objekte të trashëgimisë sonë kulturore, që kanë pasur dëmtime më parë. Pak ditë më parë edhe “EU4Culture” shprehej për këto punime në muze. “Punimet do të nisin së shpejti dhe do të ndërmerren me kujdes maksimal”, shprehej programi “EU4Culture” në faqen e tij, që ka publikuar dhe disa foto. Muzeu Kombëtar Etnografik i Krujës ndodhet brenda kalasë së Krujës. Ky muze e ka zanafillën e krijimit të tij në 20 nëntor të vitit 1989 dhe ndodhet në një objekt të ndërtuar në vitin e largët 1764 që është ish-shtëpia e Toptanëve, e cila është një ndërtesë e tipit “çardak”. Ky objekt është klasifikuar si objekt i Trashëgimisë Kulturore dhe monument kulture i kategorisë I. Objektet të cilët janë vendosur në këtë muze përveçse përfaqësojnë periudha të ndryshme të historisë së vendit, pjesa më e madhe e tyre janë objekte autentike edhe sot vazhdojnë të jenë funksionalë. Ky muze është unik në llojin të tij në të gjithë rajonin e Ballkanit për nga stili që përfaqëson. Në katin e parë, jepet një pamje e plotë i zejeve të ushtruara në Krujë dhe në të gjithë Shqipërinë.