Muzeu Historik Kombëtar, 3.201 vizitorë në muajin shkurt

Muzeu Historik Kombëtar është institucioni më i rëndësishëm muzeor në Shqipëri. MHK bën me dije se muaji shkurt i këtij viti pati një numër vizitorësh më të lartë krahasuar me vitin 2022. “Për muajin shkurt 2023 me 3,021 vizitorë në total. 323 për qind më shumë vizitorë në total në krahasim me muajin shkurt të vitit 2022 me: 714 vizitorë në total”, thuhet nga MHK. Në mjediset e muzeut janë rreth 6200 objekte, të cilat i përkasin një periudhe relativisht të gjatë kohore, duke filluar nga mijëvjeçari IV para Krishtit dhe deri në gjysmën e dytë të shekullit XX. Objekte të ekspozuara janë rreth 3100. Pjesa tjetër e objekteve janë në fonde. Muzeu Historik Kombëtar ka disa pavijone: Lashtësia, me 585 objekte; Mesjeta, me 217 objekte; Ikonografia, me 90 objekte (nga të cilat 70 janë ikona dhe 20 janë objekte liturgjike kishtare); Rilindja Kombëtare, me 230 objekte; Pavarësia, me 142 objekte, etj. Për konceptimin dhe përmbajtjen e Muzeut Historik Kombëtar ka punuar një grup pune, i përbërë nga specialistët më të mirë të muzeologjisë, arkeologjisë, historisë, etnografisë, artit pamor dhe restaurimit. Muzeu Historik Kombëtar është institucion studimor shkencor. Krahas sallave të pavijoneve, muzeu ka edhe mjediset e arkivit e të laboratorëve, salla të ekspozitave të përkohshme dhe salla konferencash. Pavijoni i Lashtësisë është nga më të pasurit në Muzeun Historik Kombëtar me afro 400 objekte të ndryshme. Interes të veçantë paraqet Mozaiku i Mesaplikut, i cili u zbulua në vitin 1979 nga arkeologu Damian Komata dhe prej vitit 1981 gjendet në MHK në Tiranë. Një kryevepër mozaiku është "Bukuroshja e Durrësit", e cila daton që nga shekulli IV para Krishtit. Mozaiku paraqet portretin e një gruaje dhe është i punuar me gurë zalli të formave të ndryshme.