Muzeu i Arsimit në Korçë mirëpret vizitorët nga Kosova dhe Maqedonia e Veriut

Muzeu i Arsimit në qytetin e Korçës këto ditë u vizitua nga një numër i konsiderueshëm turistësh. Kjo bëhet me dije nga vetë muzeu, që ka ndarë dhe foto në faqen e tij nga vizitat e ditëve të fundit. “Këto ditë festash, Muzeu i Arsimit u vizitua nga një numër i konsiderueshëm turistësh. Pjesa më e madhe e vizitorëve përbëhej nga grupet e organizuara të mësuesve që vinin nga Kosova dhe Maqedonia e Veriut”, thuhet nga muzeu në Facebook, që ka publikuar dhe disa foto të vizitorëve. Më 7 Mars në Ditën e Mësuesit në këtë muze u hap dhe ekspozita “Mësonjëtoret e para përmes dëshmive të kohës”. Një ekspozitë, e cila u organizua në kuadër të 136-vjetorit të çeljes së Mësonjëtores së Parë Shqipe. Në sallën e bibliotekës së muzeut të gjithë ata që do të duan ta vizitojnë, do të shohin për herë të parë objekte personale, dëshmi, dokumente, fotografi, letra të shkruara nga personalitetet e rëndësishme të dy shkollave që u hapën në Korçë, Mësonjëtorja e Parë Shqipe dhe Mësonjëtorja e Vashave. Tashmë pjesë e fondit të muzeut këto objekte, fotografi dhe dëshmi ju përkasin themeluesve, mësuesve dhe nxënësve të këtyre shkollave të para kombëtare dhe janë dhuruar nga pasardhësit e tyre. Mësonjëtorja e parë u çel në 7 Mars në 1887, në kushtet e pushtimit otoman dhe ajo u krijua nga një grup rilindasish, ndërsa ishte e para shkollë fillore me një fizionomi të theksuar kombëtare dhe laike, ku të gjitha mësimet jepeshin në gjuhën shqipe. Sipas dokumenteve të kohës, veprimtaria e kësaj shkolle përshkohej nga idetë patriotike, edukata e punës dhe dashuria për dije. Mësonjëtorja e Parë Shqipe u përkrah gjerësisht nga masat patriotike korçare dhe ato të mërgimit. Drejtuesit e parë të shkollës qenë patriotët e Rilindjes sonë Kombëtare, Pandeli Sotiri, Petro Nini Luarasi, Nuçi Naçi, etj, ndërsa drejtor i parë i saj u zgjodh Petro Nini Luarasi, një nga figurat kryesore të kohës, veprimtar i Rilindjes Kombëtare shqiptare.