Muzeu “Onufri” në Berat, 10.081 vizitorë në muajin maj

Muzeu i ikonografisë “Onufri” është organizuar në ambientet e kishës “Fjetja e Shën Marisë”, në kalanë e Beratit, prej 27 shkurtit të vitit 1986. Muzeu “Onufri” në muajin e kaluar pati 10.081 vizitorë. Qendra Kombëtare e Muzeumeve Berat ka publikuar të dhënat për numrin e vizitorëve, ku duket që ka një numër më të lartë se e njëjta periudhë e vitit 2022. Në vitin 2022 në muajin maj pati 4.628 vizitorë dhe të ardhura nga biletat ishin 935.150 lekë, ndërsa në vitin 2023 në muajin ishin 10.081 vizitorë dhe të ardhurat nga biletat 2.026.470 lekë. Qendra Kombëtare e Muzeumeve Berat herë pas here publikon dhe foto të vizitorëve që vizojnë muzetë, mes tyre nuk mungojnë dhe të huajt. Koleksioni i muzeut “Onufri” përbëhet nga 200 objekte të përzgjedhura nga fondet e kishave dhe manastireve të rrethit të Beratit. Ai përbëhet kryesisht nga ikona dhe një grup objektesh liturgjike. Veprat e këtij muzeu datojnë nga më të vjetrat të shekullit XIV deri në fillim të shekullit XX. Ikonat janë realizuar nga piktorët ikonografë si: Onufri, Nikolla i biri i Onufrit, Onufër Qiprioti, David Selenica, Kostandin Shpataraku, Adam Kristo si dhe piktorët me mbiemer Çetiri (Gjergji, Joani, Nikolla, Naumi, Gjergji i riu dhe Ndini), si dhe nga shumë piktorë të tjerë anonimë. Kurse objektet liturgjike, kryesisht, mbajnë firmën e argjendarëve shqiptarë ndër shekuj. Gdhendjet në dru të katedrales janë realizuar nga mjeshtrit Stefan Barka nga Misrasi i Oparit dhe mjeshtër Naum Ngjela nga Lavdari i Oparit në fillimin e shekullit XIX. Ikonostasi i katedrales Fjetja e Shën Mërisë mban si datë vitin1807. Konsiderohet si një ndër veprat më të mira të krijuara nga mjeshtrit shqiptarë të drugdhendjes.