Naim Berisha: Në sezonin e ri artistik aktorët përballen me probleme të ndryshme, teatri po vuan nga mentaliteti i uzurpimit

Problemet me të cilat përballen artistët në jetën artistike bëjnë që herë pas here ti drejtohen institucioneve për zgjidhjen e tyre. Me nisjen e sezonit të ri artistik aktorët e teatrit kërkojnë më shumë vëmendje në jetën artistike, pasi siç shprehen dhe vetë përballen me probleme të ndryshme. Aktori Naim Berisha shprehet për gjendjen me të cilat përballen aktorët në Kosovë, por thotë se është i njohur dhe me gjendjen në teatrot në Shqipëri, ku dhe këtu artistët janë shprehur herë pas here për rritjen pagave, përmirësimi i infrastrukturës ligjore, etj. Aktori Naim Berisha thotë se në Kosovë ka çështje për të cilat nuk po iu kushtohet vëmendje edhe pse janë shqetësuese për aktorët. “Në këtë fillim të sezonit të ri artistik, aktorët po vazhdojnë të përballen më probleme të shumta, përfshirë diskriminimin në pagë, ku një pjesë e aktorëve privilegjohen kundërligjshëm duke marrë pagë më të lartë se paga e tyre meritore dhe disa aktorë tjerë po ashtu kundërligjshëm diskriminohen, duke marrë pagë me të ulët se paga e tyre meritore. Edhe pas dy raporteve të dala nga Institucioni i Avokatit të Popullit, kjo çështje po vazhdon të mos adresohet, përkatësisht të injorohet”, thotë aktori Naim Berisha. Sezoni artistik tashmë ka nisur në teatrot shqiptare, por aktori Naim Berisha sjell në vëmendje dhe ndarjen e roleve në teatrin në Kosovë. Ai thotë se ky është një problem që është shndërruar pothuajse në epidemi. Sipas tij një pjesë e aktorëve në bazë afrimiteti angazhohen në shfaqje të caktuara të konsideruara më të rëndësishme.  “Një problem tjetër me të cilin po përballën aktorët e Teatrit Kombëtar, është edhe çështja e ndërhyrjes në ndarjen e roleve, i cili problem tanimë është shndërruar pothuajse  në epidemi, ku një pjesë e aktorëve në bazë afrimiteti angazhohen në shfaqje të caktuara të konsideruara më të rëndësishme në role kryesore dhe një pjesë tjetër angazhohen në shfaqje të konsideruara më periferike dhe në role po ashtu periferike në kundërshtim me kualitetin e tyre artistik dhe energjinë interpretuese. Pra edhe në këtë fillim sezon diskriminimi i aktorëve është evident”, thotë Naim Berisha. Sipas aktorit Berisha po ashtu aktorët e teatrit, po përballën edhe me çështjen e kushteve të punës, duke u detyruar që aktivitetin artistik ta zhvillojnë në ambiente të improvizuara për shkak të largimit nga objekti zyrtar me arsyetimin se i njëjti do t'i nënshtrohet rinovimit.

Institucionet e teatrit të jenë shembull funksionimi

 Si aktor Naim Berisha dhe më parë ka reaguar mbi problemet në jetën artistike me teatrin, por thotë se këto institucione si në Shqipëri dhe në Kosovë duhet të jenë shembull pozitiv për institucione të tjera. “Teatri në Kosovë dhe Shqipëri po vuan nga mentaliteti i uzurpimit...prandaj ai duhet të lirohet nga kjo mënxyrë. Këto institucione duhet të hapen kundrejt të gjithë artistëve dhe të jetë shembull pozitiv funksionimi për institucionet tjera dhe për vet shoqërinë”, shprehet aktori Naim Berisha këtë sezon të ri artistik që ka nisur. Disa javë më parë aktori promovoi dhe librin e tij “E vërteta e aktorit”, që siç u shpreh pasqyron të vërtetën e trajtimit institucional dhe ligjor të aktorit si kategori e veçantë e performuesve të artit. Aktori Naim Berisha me shfaqjet e tij nuk ka munguar dhe në skenat në Tiranë. Me shfaqjen "Artisti i vetëm" ka qenë në fillim në skenën e Teatrit Kombëtar Eksperimental dhe më pas në Teatrin Kombëtar, si dhe me shfaqjen "Club Albania" po në TK.