Nikolin Gurakuqi: Opera “Goca e Kaçanikut” një vepër patriotike, me muzikë të bukur e ngjarje interesante

“Goca e Kaçanikut” një vepër operistike shqiptare që në skenën e Teatrit Kombëtar të Operës dhe Baletit u vu në vitin 1976, do të shënojë premierën botërore në Kosovë. Vepra e kompozitorit Rauf  Dhomi nga Opera e Kosovës vjen me regji nga Nikolin Gurakuqi. Regjisori i njohur Nikolin Gurakuqi që ka sjellë në skenën e TKOB ndër vite vepra të ndryshme operistike, tregon se “Goca e Kaçanikut” është opera e parë kosovare. Regjisori Nikolin Gurakuqi thotë se në vitin 1976 ishte në kor në TKOB, ndërsa tashmë vjen si regjisor i saj në Kosovë. “Është opera e kompozitorit kosovar Rauf  Dhomi me libret të Ajmone Dhomit dhe Jusuf  Buxhovit. Opera e parë kosovare, premierë botërore në Kosovë. Tek ne është vënë në skenë në korrik 1979 me solistët më të mirë të asaj kohe. Në vitin 1979 unë sapo isha emëruar në TKOB dhe mora pjesë si korist në shfaqje. Regjisor ishte Kadri Metohu dhe dirigjent Rifat Teqja”, tregon regjisori Nikolin Gurakuqi “Mjeshtër i Madh”. Për veprën “Goca e Kaçanikut” opera e parë kosovare, që pritet të vihet në skenë në nëntor nga Opera e Kosovës janë zhvilluar dhe audicione për solistët pjesëmarrës.

Opera në skenë

Opera “Goca e Kaçanikut” që do të vijë premierë në Kosovë me regji nga Nikolin Gurakuqi është një vepër patriotike. Sipas regjisorit Nikolin Gurakuqi, kur kjo vepër u vu në skenën e TKOB dekada më parë u vlerësua shumë. “Është vepër patriotike, me muzikë të bukur e ngjarje interesante me disa linja, si lufta pa kompromis kundër pushtuesit turk dhe tradhtarëve, linja e dashurisë. Tani në Kosovë vihet për herë të parë dhe është premierë botërore, ndërsa tek ne në Shqipëri premiera e saj që ishte në 1979, për të kanë shkruar të gjitha gazetat e kohës, duke e vlerësuar shumë”, tregon regjisori Gurakuqi. Në këtë vepër bëhet fjalë për luftën kundër pushtuesve osmanë në anën e Kaçanikut dhe dashurinë e dy të rinjve: Trimorit dhe Pafikës. Këta dy ëndërrojnë për një jetë të lirë dhe të lumtur. Mirëpo tradhtari Rus Bashi i pengon, duke e akuzuar Trimorin për tradhti. Trimori burgoset, kurse Rus Bashi tenton ta rrëmbejë Pafikën. Në ndërkohë shokët e lirojnë Trimorin. Në momentin kur Rus Bashi e sulmon Pafikën, paraqitet Trimori, ndërsa Pafika arrin ta vrasë tradhtarin. Të gëzuar, të gjithë i këndojnë lirisë e dashurisë. Rauf  Dhomi është autor i shumë operave, meshave, kantatave, muzikës simfonike, partiturave filmike dhe muzikës teatrore. Regjisori Nikolin Gurakuqi e filloi aktivitetin e tij në TKOB në vitin 1979, në fillim si korist e më pas si solist, ku realizoi një sërë rolesh të ndryshme. Pas specializimit në Francë në vitin 1992-‘93, iu dedikua tërësisht regjisë në opera. Është autor i shumë veprave të vëna në skenën e TKOB, të Universitetit të Arteve, të disa qyteteve të tjera si Durrësi, Shkodra dhe jashtë Shqipërisë. Ka realizuar skenografinë e shumë shfaqjeve operistike si dhe ka bashkëpunuar me artistë të shquar shqiptarë dhe të huaj.