Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Opera “Katër i Radës” nesër në teatrin “Migjeni”, më 10 shtator në Tiranë

Postuar: 05/09/2018 - 07:21

“Katër i Radës” opera e porositur nga Bienalja e Venecias vjen dhe për publikun në Shqipëri. Vepra që është me muzikë nga Admir Shkurtaj ka bërë bashkë për realizimin e saj artistët shqiptarë, por dhe ata italianë. Kjo vepër është e fortë për mesazhet që përcjell, dhe në datën 6 qershor do të jetë në teatrin “Migjeni” në qytetin e Shkodrës. Më datë 8 shtator në Prishtinë dhe më datë 10 vjen për publikun në Tiranë. Me këtë tur kjo vepër pritet të jetë një nga momentet më të veçanta të këtij sezoni artistik që ka nisur, ku do të vijojë jo vetëm në Shqipëri për publikun në Shkodër dhe Tiranë, por ndalesën do ta ketë dhe në një mbrëmje në Prishtinë. Muzika nga Admir Shkurtaj dhe libreti Alessandro Leogrande (marrë nga romani -reportazh “Fundosja e Anijes”, Feltrinelli 2011). Vepra vjen në skenë me regji nga Salvatore Tramacere nën drejtimin e artistit Admir Shkurtaj. Kjo vepër është  prodhuar nga Cantieri Teatrali Koreja, Leçe. Drejtoresha e teatrit “Migjeni” Rita Gjeka në qytetin e Shkodrës pohon se është një moment i veçantë, që kjo vepër mbërrin në këtë teatër për publikun, ku hyrja do të jetë falas. “Ne vijojmë jo vetëm me shfaqjet tona por dhe me aktivitete të tjera. Opera “Kater i Radës” është mbrëmjen e  datës 6 qershor në teatrin “Migjeni”. Një bashkëpunim që ne e kemi pritur dhe mjaft i mirë. Kujtoj që kur kam dëgjuar më parë muzikën e luajtur nga Admir Shkurtaj jam mrekulluar. Edhe me këtë vepër besoj do të përcillet shumë për publikun, një vepër që ka historinë e saj brenda. Pas Shkodrës ajo do të vijojë si opera dhe në qytete të tjera”, tregon mes të tjerave drejtoresha e teatrit “Migjeni” të Shkodrës që nesër në mbrëmje pret operën “Katër i Radës”.

Opera në skena

E prodhuar nga Cantieri Teatrali Koreja -Leçe, opera ka qenë e porositur Bienalja e Venecias. Nga koha kur është prodhuar, kjo operë është dhënë në dhjetëra festivale të rëndësishme evropiane, përfshi edhe në festivalin e mirënjohur MESS të Sarajevës. Një anije e vogël shqiptare, e tejmbushur me burra, gra e fëmijë, fundoset në mars të vitit 1997 pranë brigjeve italiane. Katër i Radës është përpjekja, nëpërmjet muzikës, për të çliruar universin njerëzor të atyre që përjetuan njërën nga shumë tragjeditë e Mesdheut. Shkrimtari Alessandro Leogrande, i mirënjohur në Italinë fqinje si shkrimtar “rebel” që ngrihet kundër sistemit dhe shtetit të vet, kur shikon se ai, pra shteti i tij, është i padrejtë qoftë edhe me të huajt, i ngacmuar fuqishëm nga tragjedia e Marsit të vitit 1997, e mbiquajtur si tragjedia e Otrantos, u ul e shkruajti një dramë me titull “Katër i Radës”- “Il Nauragio”. Leogrande ka shkruar disa libra, madje edhe një libër për refugjatët afrikanë etj. Në libretin e tij autori Alessandro Leogrande shkruan se “Katër i Radës” nuk është veç një operë e kujtesës. “Është një përpjekje, që përmes muzikës, të shkarkohet universi i njeriut i cili shkoi për të takuar një nga shumë tragjeditë e Mesdheut: atë të një anijeje të vogël të stërmbushur me burra, gra dhe fëmijë, që u fundos, në mars të vitit 1997 në bregdet të Italisë”, shprehet Alessandro Leogrande në libretin e tij. Sipas tij, në aktin e vetëm bëhen bashkë të mbyturit e të shpëtuarit, ata që mbijetuan e ata që humbën, zërat e mendimet e tyre e, mbi të gjitha, udhëtimi i tyre drejt errësirës, plot ankth e dëshira të pakta, ëndrra e frikëra, përhumbje, shfaqje, përkujtime të papritura./Julia VRAPI

 

 

/Agjensia e Lajmeve Sot News/

Na Beni Like Ne Facebook: 
You voted 5. Total votes: 10

Lajme nga e njejta kategori

Postuar: 26/09/2018 - 07:48

Aktori Ndriçim Xhepa në një reagim të tij shprehet se produktet skenike vitet e fundit kanë nivel të ulët artistik.

Postuar: 26/09/2018 - 07:46

Xhirimet e filmit artistik me metrazh të gjatë “Bolero në vilën e pleqve” kanë nisur

Postuar: 26/09/2018 - 07:44

I angazhuar në projektin e Kinës me 16 vende të Europës Lindore kompozitori i njohur Endri Sina t

Postuar: 25/09/2018 - 09:41

Ambasada Franceze fton në Tiranë kompaninë “Transe Express” e themeluar më 1982, e ci

Postuar: 25/09/2018 - 08:05

Këtë rradhë grupimi i piktorëve pleneristë nga Shqipëria ishin të ftuar nga disa komuna të jugut

Postuar: 25/09/2018 - 07:59

Opera “Carmen” zyrtarisht realizon aktin e parë të protokollit të bashkëpunimit të TO

Postuar: 25/09/2018 - 07:57

Festivali Mbarëkombëtar i Teatrit, cilësuar si ngjarja më e rëndësishme teatrore e vitit ka nisur