Pallati i Brigadave drejt hapjes për publikun dhe shtim të funksioneve të reja, arkitektët: Ka vlera arkitektonike të veçanta

Pallati Presidencial i njohur si Pallati i Brigadave drejt hapjes për publikun dhe shtimit të funksioneve të reja. Në praninë e ekspertëve të trashëgimisë kulturore dhe ministres Elva Margariti u zhvillua dje një dëgjesë publike për hartimin e Planit të Menaxhimit të Integruar të Pallatit të Brigadave, i shpallur “Ansambël historik” dhe “Zonë e stimuluar”. Në fjalën e saj ministrja e Kulturës Elva Margariti tha ndër të tjera se kjo godinë dhe ky park nuk mund të trajtohet si një ishull i veçuar. “I gjithë ansambli historik nuk duhet të bie në grackën e një trajtimi institucional, një ishulli i veçuar brenda Tiranës, i lidhur ngushtësisht me atë përfaqësinë e lartë diplomatike, që ka ruajtur në vite dhe nuk mund të mendohet thjesht si një hapësirë, e cila për vlerat e mëdha të trashëgimisë kulturore dhe historike të jetë e lidhur ngushtë vetëm me Ministrinë e Kulturës”, tha ajo. Sipas ministres Margariti, Pallati i Brigadave nuk është vetëm godina historike, por një hapësirë prej 74 hektarësh gjelbërim, që do të shndërrohet në një park të vizitueshëm, përmes shtigjesh e ndalesash apo hapësira ekspozuese, duke u shndërruar në një pol zhvillimi për të gjithë zonën përreth. “Ky pallat do t’i rikthehet në mënyrë të denjë të gjithë komunitetit. Synimi ynë është që ky potencial kulturor do të mundësojë një zhvillim jo vetëm të kësaj zone”, tha ajo ndër të tjera.

Arkitektët: Parku i mbushur me vlera

Plani i Menaxhimit, po hartohet së bashku me Universitetin Politeknik të Tiranës, dhe në konsultim me ekspertë të fushave. I pranishëm në dëgjesën publike arkitekti Armand Vokshi tha se ansambli historik është i mbrojtur që nga viti 2004, dhe parku ka vlera për tu shndërruar në një arkitekturë interesante. “Plani sugjeron dhe propozon një vizion që mund të shërbejë për të avancuar dhe për ta nxjerrë këtë kompleks ansambël në një stad më të lartë. Parku është i mbushur me vlera të ndryshme. Nga ana tjetër ato elementë që ka vila, por dhe të tjerat që ka kompleksi mbartin vlera arkitektonike të veçanta”, tha ai mes të tjera. Plani sipas arkitektes Loreta Çapeli synon rijetëzimin pa prekur vlerat arkitekturore dhe kulturore të këtyre ndërtesave. Sipas saj, Pallati i Brigadave do të ketë funksionin e muzeut, por do të përdoret edhe për evente publike dhe private. “Duhet ta kthejmë në një muze, i cili duhet të tregojë vetën në të gjitha aspektet. Hapësirat do të përdoren për ekspozim, pa prishur ambientin në sallat kryesore. Do të bëjmë shërbime rekreative”, tha ajo. Funksionet ekzistuese janë ceremonial zyrtar i Republikës së Shqipërisë, ceremoni publike të niveleve të larta, strukturë akomoduese të delegacioneve të niveleve të larta. Në funksionet e reja propozohet muze i vetvetes nëpërmjet guidave dhe itinerareve, hapësira ekspozimi të artit, shërbime rekreative, struktura kërkimore dhe didaktike, evente publike dhe private të karaktereve të ndryshme, etj. Në fund të kësaj dëgjese publike ministrja Margariti tha më tej se ky proces do vijojë dhe në disa instanca, si në Këshillin Kombëtar Trashëgimisë Kulturore, etj. Pallati Presidencial, i njohur si Pallati i Brigadave, u projektua nga arkitektët italianë në fillim Gulio Berte dhe më pas u përfundua nga Gherardo Bosio në vitet 1939- 1941. Fillimisht ishte destinuar për  familjen mbretërore ( Mbreti Zog I), por ndërtimi i tij nuk arriti të përfundonte deri në vitin 1941. Ndërkaq Mbreti Zog ishte larguar nga Shqipëria që në vitin 1939 si pasojë e pushtimit italian të vendit. Parku që rrethon këtë pallat shtrihet në rreth 36 ha. Që nga viti 1945 ndërtesa shërben si Pallat Presidencial.