Parku kombëtar i Butrintit, Margariti: Të shtohen shërbimet

Marrëveshja për menaxhimin e parkut të Butrintit ka sjellë gjatë kësaj kohe debate dhe përplasje. Në fjalën e saj një ditë më parë në parlament, ministrja e Kulturës Elva Margariti tha se fondacioni është shqiptar dhe sipas saj duhen shtuar dhe shërbimet në park. “Fondacioni për menaxhimin e Butrintit është një fondacion shqiptar. Mirëadministrim do të thotë përdorim sa më i mirë i aseteve. Është e vërtetë që komuniteti jeton në brendësi të këtij potenciali. Është një optimizëm i të ardhurave që sjellë Butrinti. Duhen shtuar më shumë shërbime për vizitoret”, tha ministrja Margariti. Sipas ministres së Kulturës mirëadministrim do të thotë se të gjitha fondet që do të administrohen në Butrint do të investohen po për parkun. “Janë shpifje që vijnë për ngjyrosje politike. Marrim sitet tona kombëtare ti shpalosim për propagandë. Ky projektligj do t’i diskutojë të gjithë personat e përfshirë sipas një plani afatgjatë”, vijoi ministrja e Kulturës. Edhe më parë në qëndrimet e saj ministrja e Kulturës Elva Margariti është përgjigjur se kjo marrëveshje që është nënshkruar në muajin nëntor të vitit 2021 ka hapur një udhë të re të menaxhimit të trashëgimisë tonë përmes ngritjes së këtij fondacioni të posaçëm dhe ka kaluar më pas në të gjitha rishikimet në institucione e Këshillit të Ministrave, për të ardhur me të gjitha reflektimet e rekomandimet. Sipas saj, pronësia e territori dhe asetet e Butrintit i mbeten Ministrisë së Kulturës si përfaqësues i shtetit. Butrinti do të menaxhohet nga një fondacion i posaçëm bashkëthemeluar midis Ministrisë së Kulturës dhe Fondacionit Shqiptaro-Amerikan për Zhvillim. Në saj të vlerave të larta historiko-kulturore qyteti antik i Butrintit u përzgjodh fillimisht si monument kulture në vitin 1948, në ligjin e monumenteve të Kulturës së Shqipërisë. Në vitin 1992 Butrinti u pranua si vendbanimi i parë arkeologjik i Shqipërisë në listën e trashëgimisë botërore të UNESCO-s.