Pavijoni i Lashtësisë, nga më të pasurit në MHK

Muzeu Historik Kombëtar edhe këtë sezon vere pret vizitorët në pavijonet e tij. Muzeu herë pas here publikon materiale edhe rreth aktiveve që zhvillohen, ku nuk mungojnë dhe të dhënat për vizitorët e ndryshëm. Muzeu është konceptuar që prezantimi i tij të bëhet nëpërmjet tetë pavijoneve. Pavijoni i Lashtësisë është më i rëndësishëm dhe nga më të pasurit në Muzeun Historik Kombëtar, me afro 400 objekte të ndryshme. Pavijoni i Lashtësisë gjendet në katin e parë të Muzeut Historik Kombëtar. Objektet e paraqitura aty nisin me Paleolitin e Vonë, ku kultura prehistorike dëshmohet qartë në trojet tona. Mënyra e jetesës pasqyrohet në vendbanimin e Trenit, ndërtimet palafite në Maliq të Korçës dhe pranë tokave bujqësore. Ndërmjet koleksioneve të objekteve të periudhës së neolitit të vonë dallohen ato të vendbanimit prehistorik të Maliqit. Në Pavijonin e Lashtësisë janë ekspozuar edhe objekte që i përkasin periudhës së Mesjetës së Hershme. Interes të veçantë paraqesin objektet e “Kulturës së Komanit” (Pukë). Inventari i objekteve të zbuluara dhe tipi i varreve të Komanit dëshmojnë për një ngjashmëri të qartë me kulturën ilire. Kultura e Komanit dëshmon për vazhdimësinë iliro-arbërore e shprehur në objektet arkeologjike, toponimi dhe në objektet etnografike. Për rrjedhojë, arbrit ishin pasardhësit e popullsisë ilire në periudhën e mesjetës. Objektet e paraqitura në vitrinat e tjera i përkasin periudhës së bronzit dhe asaj të hekurit. Skulpturat e shkollës apolloniate si “Hyji Apollon” (shek. IV para Kr.), janë nga skulpturat më të bukura të kohës. Objekte me interes janë: mozaiku “Bukuroshja e Durrësit” (shek. IV para Kr.), pamja antropomorfe e lumit Vjosa (shek. III-II para Kr.), koka e Artemisës (shek. III para Kr.), portreti i një burri në gur gëlqeror (shek. V pas Kr.) dhe objektet e varrit monumental të Selcës së Poshtme, Pogradec (shek. III para Kr.). Muzeu Historik Kombëtar u përurua më 28 tetor 1981 dhe është institucioni muzeor më i madh në Shqipëri.