Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

“Post-Avangarda Lindore”, me punët e tre artistëve nga Shqipëria në Kosovë

Postuar: 20/10/2019 - 08:01

Ekspozita “Post-Avangarda Lindore” me punët e tre artistëve nga Shqipëria u hap në galerinë e Ministrisë së Kulturës në Kosovë. Nën organizimin kuratorial të kritikes së mirënjohur të artit, Suzana Varvarica Kuka, autorët e kësaj ekspozite janë Adrian Çene, Albana Shoshi dhe Brikena Bërdo. Të tre artistët janë të njohur me aktivitetin e tyre me pikturën dhe herë pas here janë prezantuar në ekspozita të ndryshme. Këtë radhë janë me pikturat e tyre në Prishtinë, kur për disa ditë punët e tyre do të qëndrojnë të ekspozuara në galerinë e Ministrisë së Kulturës. Piktori i njohur Adrian Çene tregon se në ekspozitën “Post-Avangarda Lindore” prezantohet me një cikël punimesh. “Në këtë ekspozitë jam paraqitur me gjashtë punë, ku pesë prej tyre janë në gjininë e ekspresionizmit abstrakt, ndërsa njëra është figurative. Kjo ishte një përzgjedhje e kuratores Suzana Varvarica Kuka, që unë të prezantohesha me këtë cikël punimesh këtë herë në ekspozitën “Post-Avangarda Lindore”, pohon piktori i njohur Adrian Çene. Tre artistët janë prezantuar me punët e tyre në galerinë e artit të Ministrisë së Kulturës në Kosovë, por piktori Adrian Çene shprehet se kjo ekspozitë pati impakt pozitiv dhe pjesëmarrësit kanë të përbashkët bashkëkohoren në punët e tyre. “Ekspozita u përcoll nga disa media të Kosovës dhe pati goxha impakt pozitiv. Në këtë ekspozitë tre autorët pjesëmarrës kanë individualitete të veçanta, por e përbashkëta në punën tonë është bashkëkohorja, ku Suzana Varvarica si kuratore e ka shpjeguar shumë mirë në konceptin e ekspozitës”, pohon piktori Çene.

 Krijimtaria e ekspozitës

Ekspozita kolektive/kuratoriale e titulluar “Post-Avangarda Lindore” në galerinë e Ministrisë së Kulturës u hap në kuadër të kalendarit të përbashkët kulturor ndërmjet Kosovës dhe Shqipërisë. Përmes një emërtimi të tillë të ekspozitës, kuratorja Varvarica-Kuka, synon të “provokojë” botën artistike shqiptare dhe jo vetëm, nëse arti i vendeve të ish-Bllokut të Lindjes (ku dikur bënin pjesë Kosova e Shqipëria) arrin që t’i bëjë ballë estetikisht artit të vendeve perëndimore thuhet në një komunikatë të galerisë së Ministrisë së Kulturës. “Duke i bërë bashkë tre artistë të shquar nga Shqipëria, kuratorja Varvarica-Kuka synon gjithashtu të ndërthurë dhe ballafaqojë në njohje dhe komunikim, artin pamor të krijuesve shqiptarë nga të dy anët e kufirit administrativ Kosovë-Shqipëri”, vijon njoftimi për ekspozitën. Tre artistë, tri forma, tre preokupime vetjake dhe piktura janë bërë bashkë në ekspozitën “Post-Avangarda Lindore”, e cila ka si mision t’i vlerësojë artistët shqiptarë, që tentojnë të mbajnë në ritëm zhvillimin e shoqërisë e kulturës shqiptare në shekullin e XXI. Në materialin për ekspozitën, thuhet se qëllimi i saj është të ndërthurë në njohje dhe komunikim kulturën pamore të artistëve nga Shqipëria me kulturën pamore të artistëve të Kosovës. Krijimtaria e kësaj ekspozite e pasuron gjuhën e botës krijuese të artistëve shqiptarë të sistemit dhe historisë ndërkombëtare të artit. “Post-avangarda…, ky term ndjellës, i bën bashkë tre artistët e rinj shqiptarë, të cilët aplikojnë gjestin e pikturimit mbi telajo, sjellin natyrshmërinë e krijimit vetjak, mbi të cilin aspirojnë profesionalizëm dhe dëshirë, si dhe i kushtëzohen trajtesave të njohura dhe praktikave të sprovuara të artistëve ndërkombëtarë, që u shfaqën nga mesi i shek. XIX e vijojnë deri në kohën tonë”, vijon njoftimi i galerisë së Ministrisë së Kulturës. Ekspozita do të qëndrojë e hapur deri më 10 nëntor.

Nga Julia Vrapi

/Agjensia e Lajmeve Sot News/

Na Beni Like Ne Facebook: 

Lajme nga e njejta kategori

Postuar: 16/11/2019 - 07:44

Artisti i njohur Agim Sulaj ka fituar “Grand Prix Aydin Dogan Stamboll”.

Postuar: 16/11/2019 - 07:43

Plani i menaxhimit të integruar i parkut kombëtar të Butrintit solli përplasjen e ministres së Ku

Postuar: 16/11/2019 - 07:40

Muzetë e Beratit gjatë këtij viti kanë qenë vende të preferuara për vizitorët.

Postuar: 16/11/2019 - 07:38

Botimet e shtëpisë botuese “Morava”, në Panairin e Librit “Tirana 2019” k

Postuar: 15/11/2019 - 07:30

Konferenca shkencore ndërkombëtare "Shqiptarët dhe koalicioni antifashist në Luftën e Dytë B

Postuar: 15/11/2019 - 07:29

Shfaqja “Mbrëmë i pëshpërita një ylli”, nesër në mbrëmje vjen për publikun në teatrin

Postuar: 15/11/2019 - 07:27

 Festivali i filmit “Anifest Rozafa” përfundoi edicionin e dhjetë në qytetin e S