Problemet e arkeologjisë shqiptare në konferencën shkencore  në Shkodër

Problemet e arkeologjisë shqiptare në konferencën shkencore  në Shkodër

Konferenca shkencore ndërkombëtare, “Probleme të reja të albanologjisë në kohën e sotme” u zhvillua dy ditë në Shkodër. Ndër problemet që u trajtuan ishin dhe ato të arkeologjisë. Në konferencën që u mbajt në Universitetin e Shkodrës “Luigj Gurakuqi”, në bashkëpunim me Akademinë e Shkencave të Shqipërisë, prof.dr. Neritan Ceka mbajti kumtesën për kërkimet arkeologjike në Shqipëri dhe në Kosovë dhe çështje programatike të funksionimit në sistem, që kanë të bëjnë me karakterin e qytetërimit antik ilir e më gjerë. Prof. dr. Ceka foli për ndryshimin e ndjeshëm në vitet e fundit në objektivat kryesore të kërkimeve arkeologjike shqiptare, si dhe në format e organizimit të kërkimit shkencor, por dhe të promovimit e menaxhimit të trashëgimisë kulturore arkeologjike. Prof. dr. Ceka theksoi se angazhimi i studiuesve të huaj drejtpërdrejt në kërkimet arkeologjike në terren, si dhe krijimi i një shkolle të re arkeologjike në Republikën e Kosovës, kanë krijuar një peizazh më të artikuluar të arkeologjisë në Shqipëri. Në kumtesën e tij arkeologu Ceka spikati problemet kryesore që qëndrojnë sot para arkeologjisë shqiptare në fushën e antikitetit ilir, të cilat i përmblodhi në këto pyetje: Do të vazhdojë arkeologjia të orientohet nga sqarimi i çështjeve programatike që kanë të bëjnë me karakterin e qytetërimit antik ilir, të bazës së tij politike në formatin e mbretërisë ilire dhe bashkësive qytetare të tipit koinon? Do të ketë një koordinim të kërkimeve me institucionet e Ministrisë së Kulturës në sitet arkeologjike që janë pjesë e strategjisë kombëtare për zhvillimin e turizmit kulturor? Do të ketë një mbështetje financiare të kërkimeve arkeologjike, që do të mundësojë zhvillimin e pavarur të tyre dhe krijimin e një gjenerate arkeologësh në tërë hapësirën shqiptare, që përkon edhe me shtrirjen e dikurshme të qytetërimit antik ilir? Përmes kësaj kumtese prof. dr. Ceka bëri edhe disa propozime konkrete për zgjidhjen e problemeve të spikatura më lart. Konferenca në Shkodër u zhvillua në datat 25 dhe 26 maj.