Programi “Europa Krijuese”, Margariti: Përmes këtij prezantimi hapëm siparin e një kalendari takimesh  

Prezantimi i programit “Europa Krijuese” u bë në Ditën Kombëtare të Trashëgimisë Kulturore. Në takimin që u zhvillua në Teatrin Kombëtar të Operës dhe Baletit të premten merrnin pjesë artistë, profesionistë kulturorë dhe audiovizualë, organizata, etj. E pranishme në këtë takim ishte dhe ministrja e Kulturës Elva Margariti. Ministrja Margariti shprehet se nuk është e rastësishme që takimi për prezantimin e programit “Europa Krijuese” e zhvillua në Ditën Kombëtare të Trashëgimisë Kulturore. “Sepse Europa është trashëgimia dhe e ardhmja jonë dhe në këtë të ardhme që i përket familjes europiane ne do të shkojmë me të gjithë pasurinë tonë kulturore, por edhe me potencialin tonë krijues”, shprehet Margariti në rrjete sociale që ka ndarë dhe disa foto të takimit, që u zhvillua të premten në një nga sallat e TKOB. Ministrja e Kulturës Elva Margariti gjithashtu bën ftesë për artistët e profesionistët kulturorë e audiovizualë, si dhe organizatat të aplikojnë në këtë program për mbështetje financiare. “Përmes këtij prezantimi hapëm siparin e një kalendari të ngjeshur takimesh në të gjithë vendin, duke synuar që asistenca jonë t’ju vijë në ndihmë artistëve, profesionistëve kulturorë dhe audiovizualë, si dhe organizmave publike dhe private, që ushtrojnë aktivitetin e tyre në fushën e arteve skenike, arteve të bukura, botimit, filmit, televizionit, muzikës, arteve ndërdisiplinore, trashëgimisë dhe industrisë së videolojërave.  I ftojmë që të aplikojnë pranë këtij programi për mbështetje financiare”, shprehet Margariti, që shton më tej se shpresojnë që numri i projekteve fituese të aplikantëve shqiptarë në këtë program të jetë gjithmonë në rritje.