Projekti i inventarizimit të Trashëgimisë Kulturore Jomateriale, një regjistër i plotë kombëtar deri në fund të 2025

Regjistri i plotë kombëtar për Trashëgimisë Kulturore Jomateriale duhet të përfundojë deri në fund të vitit 2025. Projekti i inventarizimit të Trashëgimisë Kulturore Jomateriale (TKJ) në Shqipëri, ka synuar së pari hartimin e një metodologjie të përshtatur për inventarizim përmes një skeme trajnimesh dhe workshop-esh. Së dyti, inventarizimin e elementeve të kësaj trashëgimie të pranishëm në rajone të përzgjedhura në territorin e vendit, përfshirë këtu elementet e TKJ-së së 5 pakicave kombëtare dhe etno-gjuhësore të pranishme. Qendra Kombëtare e Veprimtarive Folklorike shprehet në faqen e saj se procesi i inventarizimit do të vijojë edhe në ato zona që kanë mbetur, por regjistri i plotë duhet të hartohet deri në fund të 2025. “Ministria e Kulturës do të vazhdojë procesin e inventarizimit dhe do të aplikojë metodologjinë në të gjitha zonat e mbetura të Shqipërisë, në mënyrë që deri në fund të vitit 2025, të hartohet një regjistër i plotë kombëtar”, shprehet ndër të tjera QKVF. Një element tjetër i studiuar gjatë projektit të inventarizimit të Trashëgimisë Kulturore Jomateriale është ''Zanati i furxhiut".  Qendra Kombëtare e Veprimtarive Folklorike shprehet se këtë element e hasim kryesisht ne zonën e Korçës, Devollit, Kolonjë, Maliq dhe Pogradec.

Projekti dhe UNESCO

Projekti për inventarizimin shihet me rëndësi për Trashëgiminë Kulturore Jomateriale. Një projekt që sipas QKVF ka edhe mbështetjen e UNESCO-s. “Projekti për inventarizimin e Trashëgimisë Kulturore Jomateriale në republikën e Shqipërisë është një projekt i iniciuar nga Ministria e Kulturës me mbështetjen e UNESCO-s”, thuhet nga Qendra Kombëtare e Veprimtarive Folklorike. Në tetor të vitit të kaluar në ambientet e Ministrisë së Kulturës u mbajt mbledhja e radhës e Këshillit Kombëtar të Trashëgimisë Kulturore Jomateriale, ku u miratua programi i inventarizimit dhe digjitalizimit të kësaj trashëgimie. Sipas MK, ky regjistër digjital po realizohet falë ndihmës së Fondit të Mbështetjes Ndërkombëtare të UNESCO-s. KKTKJ-ja ka kompetencë: a) të mbikëqyrë veprimtarinë në fushën e pasurive kulturore jomateriale; b) të miratojë e të hartojë strategjinë dhe programin e zhvillimit në këtë fushë; c) të miratojë, në parim, kërkesën për deklarimin e interesit kulturor; ç) të hartojë dhe të miratojë strategjinë dhe programe të zhvillimit në fushën e trashëgimisë kulturore jomateriale; d) të ndjekë dhe të mbikëqyrë veprimtaritë që zhvillohen në fushën e trashëgimisë kulturore jomateriale;  etj. Trashëgimia Kulturore Jomateriale ose shpirtërore përfshin krijimtarinë artistike tradicionale të një komuniteti, përmes vlerave që transmetohen gojarisht ose me mjete të tjera, të cilat në thelb pasqyrojnë kulturën dhe identitetin e pjesëtarëve të tij.