“Pse nuk qëndron për mëngjes”, me një histori unike në festivalin teatror “Hapat”

“Pse nuk qëndron për mëngjes” është një histori unike, që nis me një takim të jashtëzakonshëm dhe vazhdon me një dinamikë aq sa komike po aq edhe rrënqethëse. Vepra teatrore u shfaq në skenën e Teatrit Kombëtar Eksperimental “Kujtim Spahivgoli” , në netët e festivalit teatror “Hapat”. Vepra e autorëve G.Stone & R.Cooney erdhi në skenë me regji nga Delvis Bejleri. Bela një 17-vjeçare në muajin e nëntë të shtatzanisë, në përpjekje për t'i shpëtuar një sherri agresiv, strehohet në shtëpinë e Dejv. Dejv një punonjës ministrie rreth të 40-tave, i divorcuar nga e shoqja gjendet i papërgatitur përballë kësaj situate. Pas shumë viteve që jetonte vetëm, me një motër të sëmurë mendërisht, papritur në shtëpinë e tij është një vajzë, një bebe dhe shumë debate e ndjenja. Vepra u soll në skenë për publikun nga dy aktorë Delvis Bejleri dhe Belkisa Zhelegu. Vepra teatrore është produksion i “Fondit të teatrit për të rinj” mbështetur nga Teatri Kombëtar Eksperimental “Kujtim Spahivogli” dhe teatri "Bylis" Fier. 14 shfaqjet teatrore që u realizuan nga ky fond finalizohen me pjesëmarrjen në festivalin teatror “Hapat” që zhvillohet nga data 30 nëntor deri më 13 dhjetor. Shfaqjet luhen në skenën e Teatrit Kombëtar Eksperimental “Kujtim Spahivogli”, teatrit Metropol dhe teatrit privat “Zonja e Bujtinës”. Festivali ka natyrë kompetitive. Vlerësimet do të kryhen nga juria profesioniste e përbërë nga zj. Aneta Malaj, zj. Armela Demaj dhe z. Enke Fezollari. Çmimet që do të jepen janë: Shfaqja më e mirë; Regjia më e mirë; Aktori më i mirë; Aktorja më e mirë. Në fondin e të rinjve ka pasur një numër të lartë propozimesh, ku kanë qenë plot 39 të tilla dhe pjesët për të qenë në skenë janë zgjedhur nga bordi artistik i TKEKS. Projektet përfituese nga ky fond u realizuan nën kujdesin e Teatrit Kombëtar Eksperimental, ndërsa teatrot e rretheve mbështetën projektet përmes logjistikës teatrore.