Punime në urën prej druri në kalanë e Lezhës

Në kalanë e Lezhës po punohet për zëvendësimin e elementeve të dërrasave në urën prej druri. Kjo bëhet me dije nga Drejtoria Rajonale e Trashëgimisë Kulturore Shkodër, që shprehet se ky proces është i rëndësishëm, pasi ka të bëjë me përmirësimin e infrastrukturës në sitet tona arkeologjike. “Ekipi i mirëmbajtjes DRTK Shkodër ka nisur punën për zëvendësimin e elementeve të dërrasave në urën prej druri në kalanë e Lezhës. Puna konsiston në identifikimin e elementëve strukturor  të urës prej druri që janë të dëmtuara ose të vjetra dhe kanë nevojë për zëvendësim. Ky proces i rëndësishëm ka të bëj me përmirësimin e infrastrukturës së aksesit në sitet tona të vizitueshme, dhe vendosjen e sinjalistikës së nevojshme, duke nisur nga parku arkeologjik Lezhë për të qenë gati për sezonin e ardhshëm turistik për vitin 2024”, thuhet nga Drejtoria Rajonale e Trashëgimisë Kulturore Shkodër, që ka ndarë dhe disa foto gjatë procesit të punës në faqen e saj. Kalaja e Lezhës ngrihet në majë të një kodre me lartësi 186 metra, në lindje të qytetit. Kalaja ka origjinë ilire. Në vitin 1440 ajo iu nënshtrua një rindërtimi nga venedikasit, ndërsa në vitin 1522 pas pushtimit osman u rindërtua edhe nga ana e tyre. Këtu mund të shikohen gjurmë të arkitekturave ilire, romake, bizantine dhe osmane. Objektet më interesante për t’u vizituar janë rrënojat e ndërtesave osmane brenda kalasë, xhamia, kulla në murin juglindor me një hark romak dhe kulla ilire në murin jugor. Kalaja e Lezhës është monument kulture. Prej saj shihet një pamje mjaft e bukur e fushës së Lezhës dhe e detit Adriatik. Puna që po bëhet këtë kohë në kalanë e Lezhës vjen në vijim dhe të ndërhyrjeve të tjera, që kanë bërë më parë ekipet e DRTK Shkodër në objekte të trashëgimisë kulturore.