QKLL, një takim mbi pjesëmarrjen e Shqipërisë në  Panairin e Librit në Torino

Shqipëria do të jetë e ftuara e nderit në Panairin e Librit në Torino. Panairi do të zhvillohet nga data 18 deri më 22 maj. Drejtoresha e Qendrës Kombëtare të Librit dhe Leximit Alda Bardhyli bashkë me përfaqësues të Regione Puglia, botuesin italian, z. Livio Muci, i cili ka një kontribut në njohjen e librit shqip në gjuhën italiane, kryetarin e Shoqatës së Botuesve, z. Petrit Ymeri, përfaqësues të Ministrisë së Kulturës, biseduan për një përfaqësim sa më dinjitoz të librit e autorit shqiptar në këtë ngjarje të rëndësishme për botën letrare, nën kujdesin e Ministrisë së Kulturës së Shqipërisë. "Përmes pasqyrës" është tema e edicionit XXXV të Sallonit Ndërkombëtar të Librit të Torinos. Një himn për imagjinatën, forcën që e ka shtyrë gjithmonë njeriun përtej banalitetit, jetës së përditshme, përtej vetë realitetit dhe një homazh për universin brilant të autores britanike Lewis Carroll. Më herët në muajin shkurt edhe ministrja e Kulturës Elva Margariti ka shprehur se në këtë panair të librit vendi ynë do të prezantohet me dinjitet me disa nga përfaqësuesit e letërsisë sonë. “E pritëm me kënaqësi ftesën dhe besojmë se do të prezantohemi me dinjitet me disa nga përfaqësuesit e letërsisë dhe editorisë sonë, përmes veprës së të cilëve rizbulojmë dhe ridimensionojmë veten, por dhe prezantohemi në syrin e lexuesit të huaj. Ne mezi presim të takohemi në Torino, në emër të letërsisë por edhe në emër të bukurisë”, u shpreh më parë Margariti në një videomesazh. Panairi Ndërkombëtar i Librit në Torino është më i madhi në Itali dhe një prej më të rëndësishmëve në Europë dhe në rajonin e Mesdheut. Takimi së fundmi mbi pjesëmarrjen në këtë panair u zhvillua në QKLL dhe vjen në vijim të punës së kësaj qendre. Misioni i QKLL-së është ndjekja dhe zbatimi i projekteve në fushën e librit, sipas programit qeverisës të ministrisë përgjegjëse për librin.