QSPA me kërkimin shkencor, botimet dhe përhapjen e kulturës arbëreshe

Qendra e Studimeve dhe Publikimeve për Arbëreshët (QSPA) nisi punën tre vjet më parë. QSPA shprehet se misioni i saj është i orientuar në tri hulli kryesore, të cilat konkretisht janë kërkimi shkencor, botimet dhe përhapja e kulturës arbëreshe. “Në funksion të këtyre tri hullive, në harkun kohor të këtyre tre viteve janë kryer 15 botime, 1 revistë studimore periodike, 3 kuvende, aktiviteti “Ditët e Librit Arbëresh” dhe një sërë aktivitetesh kulturologjike në funksion të përhapjes së kulturës arbëreshe. Njëkohësisht, janë nënshkruar 20 marrëveshje me institucione akademike dhe institucione të qeverisjes vendore brenda dhe jashtë vendit si në Kosovë, Maqedoninë e Veriut dhe në rajonet e komunat e Arbëreshëve të Italisë”, thuhet ndër të tjera nga Qendra e Studimeve dhe Publikimeve për Arbëreshët në një material publikuar në faqen e saj në rrjete sociale. Në vitin 2021 Qendra e Studimeve dhe Publikimeve për Arbëreshët (QSPA), organizoi dhe kuvendin e parë të saj me temën: “Gjendja aktuale e studimeve arbëreshe”. Ky tubim synoi të nxjerrë në pah arritjet në lëmitë e ndryshme të studimeve mbi universin arbëresh si në studimet gjuhësore, studimet letrare, etnografike, antropologjike kulturore, të çështjeve juridike që lidhen me statusin aktual të arbërishtes. Kuvendi pati të ftuar, kumtues me emër e reputacion të spikatur në mjedisin studimor. Qendra është krijuar në shtator 2019 me VKM nr. 601, datë 4.9.2019. Në janar të vitit 2020 është emëruar drejtori ekzekutiv i QSPA-së dhe më 11 mars ka filluar aktivitetin e punës me stafin. Këshilli Koordinues i Qendrës së Studimeve dhe Publikimeve për Arbëreshët është i përbërë nga nëntë përfaqësues prej institucioneve shtetërore dhe përfaqësues të komunitetit arbëresh.