Senati i ASA-s mblidhet për buxhetin dhe aktivitetet, shqetësim mungesa e fondeve për investimet në rikonceptimin e Muzeut të Arkeologjisë dhe arkivat e instituteve 

Programi për aktivitetet, buxheti i këtij viti apo dhe puna në Muzeun e Arkeologjisë u diskutuan në mbledhjen e Senatit të Akademisë së Studimeve Albanologjike. Senati i ASA-s u mblodh nën drejtimin e rektorit prof. dr. Luan Përzhita për të miratuar buxhetin dhe programin për aktivitetet shkencore dhe botimet e vitit 2023. Akademia e Studimeve Albanologjike shprehet  se një nga çështjet e rëndësishme, e rimarrë në shqyrtim, ishte hapja e Laboratorit të Restaurimit dhe Arkeometrisë në mjediset e Institutit të Antropologjisë Kulturore dhe Studimit të Artit. Anëtarët e Senatit diskutuan për perspektivën e afërt të Shkollës së Doktoraturës, po edhe për mundësinë e digjitalizimit të bibliotekave të ASA-s, por problem është puna te Muzeu i Arkeologjisë në Tiranë apo dhe arkivat. Kjo sipas ASA-s për shkak fondeve që mungojnë. “U shpreh shqetësimi për mungesën e fondeve për investime në rikonceptimin e Muzeut të Arkeologjisë dhe për arkivat e instituteve të ASA-s”, thuhet nga Akademia e Studimeve Albanologjike. Por buxheti i këtij viti, krahasuar me buxhetin e vitit 2022, krijon mundësinë që të katër institutet e Akademisë së Studimeve Albanologjike, të përmbushin botimin e më shumë titujve, rreth 55 dhe të realizojnë më shumë aktivitete shkencore, konferenca kombëtare, mbarëkombëtare dhe ndërkombëtare, ekspedita hulumtuese dhe dokumentuese, ligjërata, seminare dhe ekspozita, që do të përmbyllen në fund të vitit me “Ditët e Albanologjisë”.

Bashkëpunimi ndërkombëtar

Në Akademinë e Studimeve Albanologjike vazhdon bashkëpunimi ndërkombëtar për projekte kërkimore me qendra dhe institute shkencore, partnere të Akademisë së Studimeve Albanologjike, nga vende si Franca, Italia, Anglia, Greqia, Gjermania, SHBA-të, etj, po edhe me qendrat albanologjike në Shkup dhe Prishtinë, sipas memorandumit të bashkëpunimit i nënshkruar në vitin 2021. Në ditët në vazhdim ASA do të bëjë publike dhe kalendarin e aktiviteteve e të botimeve për secilin institut për vitin 2023. Qendra e Studimeve Albanologjike (sot Akademia e Studimeve Albanologjike) u krijua në kuadër të ristrukturimit e të modernizimit të sistemit universitar dhe akademik shqiptar, me vendim të Këshillit të Ministrave, nga bashkimi i katër Instituteve (Arkeologji, Gjuhësi dhe Letërsi, Histori, Kulturë Popullore) dhe i dy njësive kërkimore (Studimi i Artit, Enciklopedia Shqiptare) të ish-Akademisë së Shkencave të Republikës së Shqipërisë. ASA ofron përvojën dhe shërbimin e vet jo vetëm në realizimin e projekteve me interes shkencor e publik, por edhe në transferimin e dijeve, nëpërmjet shkollave të Masterit e të Doktoraturës në fushat e në specialitetet që mbulon.