Shfaqja “Ivanov” e Teatrit Kombëtar në Festivalin e Teatrit Shqiptar “Moisiu”

Festivali i Teatrit Shqiptar “Moisiu” këtë edicion ka 12 trupa teatrore. Festivali në Shkup u çel me shfaqjen “Ivanov” nga autori Anton Çehov me regji nga Hervin Çuli. Në rolet e veprës janë aktorët Dritan Boriçi, Luli Bitri, Elia Zaharia, Alfred Trebicka, Neritan Liçaj, Flaura Kureta, Laert Vasili, Dori Çaushi, Gert Ferra, Anila Bisha, Gjergj Mena, Erin Kujofsa, Genti Deçka, Donald Shehu dhe Sofi Kotepano. Në veprën e Anton Çehovit, dikur një anëtar mjaft i suksesshëm i Këshillit të Qarkut, një njeri plot humor, pasion dhe dashuri, Nikollaj Ivanov po kalon një krizë të moshës së mesme. Ai nuk ka më ndjenja për gruan e tij Anën, e cila sakrifikoi gjithçka për të, është thellësisht në borxhe, rrezikon të humbasë pasurinë e tij, dhe ajo që është më shqetësuese, ai është në depresion të thellë. Por, sado i vetëdijshëm të jetë ai për këtë ndryshim, duket se nuk mund t’a ndalë dot dhe kjo i prek të gjithë rreth tij. Më herët Teatri Kombëtar shprehej se në traditën më të mirë të bashkëpunimeve mes teatrove shqiptare vjen kjo ngjarje e madhe kulturore. “Bashkëfinancimi i institucioneve qëndrore, Ministria e Kulturës së Shqipërisë, Ministria e Kulturës së Kosovës dhe Mistria e Kulturës së Maqedonisë së Veriut, bënë të mundur këtë festival. Më tej me bashkëpunimin dhe bashkë-organizimin mes Teatrit Kombëtar të Shqipërisë,Teatrit Kombëtar të Kosovës,Teatrit Shqiptar Shkup dhe Teatrit Kombëtar Eksperimental "Kujtim Spahivogli", për 12 ditë do prezantohen në skenën e Teatrit Shqiptar të Shkupit krijimet më të mira në fushën e teatrit, duke veçuar në fund më të mirët, të cilët do të vlerësohen me çmimin "Moisiu"”, thuhet nga TK. Festivali që nisi më datë 16 nëntor do të vijojë deri më datë  27 nëntor në Shkup .