Shfaqje me fëmijët dhe ekspozitë pikture në COD në 1 Qershor

Një ditë me aktivitete do të jetë 1 Qershori në Qendrën për Hapje dhe Dialog. Shfaqje me fëmijët, një ekspozitë pikture, ku nuk mungon në aktivitete dhe pjesëmarrja e emrave të njohur të artit për festën e 1 Qershorit, Ditën e Fëmijëve. Shfaqja “Busulla Magjike” është në bashkëpunim me Qendrën për Hapje dhe Dialog COD. Me regji nga Najada Elmazi, koreografe është Xheni Saliu, me pjesëmarrjen e aktores Marjana Kondi “Mjeshtre Madhe”. Në materialin rreth shfaqjes nga regjisorja, thuhet se me punën  e palodhur të fëmijëve, me provat e shumta është ndërtuar një histori që udhëtojmë në kohë. “Një aventurë, e cila na njeh me një grup fëmijësh çamarrok, me tre magjistrica, me periudhën e Egjiptit, anijes kozmike dhe planetin e fëmijëve. Nëpërmjet imagjinatës dhe fantazisë ata kalojnë  në kohë, duke u transformuar. Në ditët në vazhdim do zbulojmë pak e nga pak nga skenat tona, me tekst kaq të bukur të improvizuar në proces provash. Një pjesë kaq origjinale, ku çdo aktor i vogël ka veçantitë e veta”, thuhet në materialin e regjisores Elmazi rreth shfaqjes. Pjesë e aktiviteteve është dhe ekspozita me punët në pikturë të fëmijëve nën drejtim artistik të Ermira Isufit. Organizatorët e shfaqjes dhe ekspozitës falenderojnë stafin e COD për përkushtimin dhe profesionalizmin, ku sipas tyre do të jetë një ditë e veçantë për fëmijët, që do të kalojë në një atmosferë të bukur. Drejtoresha e Përgjithshme e Agjencisë për Dialog dhe Bashkëqeverisje është Eridana Çano. Që prej fillimit, COD-i ka krijuar projekte për artin, debatin social dhe edukimin kulturor, si dhe ka vendosur standarde për cilësinë e organizimit të veprimtarive dhe të performancës artistike, duke i dhënë të gjithëve, por veçanërisht fëmijëve, hapësirën për të qenë të lirë të shprehen. Dita e Fëmijëve është vendosur më 1 Qershor, pasi në këtë datë është mbajtur konferenca botërore e mirëqenies së fëmijëve në Gjenevë, në 1925.