“Standard i dyfishtë”, për publikun në GAT deri në fund të janarit

 Ekspozita “Standard i dyfishtë” në Galerinë e Artit Tiranë u prezantua këto ditë janari me punimet e artistit sirianin Mohammad Ramadan. Ekspozita do të qëndrojë në GAT deri më 31 janar për publikun. Ekspozita vjen e kuruar nga dr. Abaz Hado -drejtor i Galerisë së Artit Tiranë dhe Ormira Lulani - Kuratore, specialiste e sektorit të arteve dhe projekteve (GAT). Kjo është dhe ekspozita e parë e 2022 në GAT. Mohammad Ramadan ka lindur në vitin 1994 në Damask, Siri. Në vitin 2021 vendoset në Shqipëri, ku dhe aktualisht jeton. Është diplomuar në Fakultetin e Arteve, Universiteti i Damaskut, në Departamentin e Pikturës dhe Fotografisë ne vitet 2017/2018. Si artist ia ka marrë pjesë në disa ekspozita të përbashkëta dhe një ekspozitë personale. “Standard i dyfishtë” në një botë paralele, ku reflektohet frika dhe dobësitë e njeriut. Emocione në dukje të pafundme, ku personazhet fillojnë të tkurren dhe të mbështillen rreth vetes në formën e kutisë në të cilën ato banojnë. Një plak me kafshën e tij shtëpiake, një vajzë dhe një i ri, këto janë personazhet të ndara në përkufizimin e 6 pikturave me shumë forma dhe dallime në raca, por që janë të ngjashme nga ajo që përcjellin. Të lidhura mes tyre, pikturat pasqyrojnë fatin e secilit në lidhje me të tjerët. Dr. Abaz Hado drejtor i Galerisë së Artit Tiranë dhe Ormira Lulani - kuratore, specialiste e sektorit të arteve dhe projekteve (GAT) shprehen në tekstin e tyre se personazhet qëndrojnë brenda një bote të braktisur, në hapësira të privuara nga koha, ku koha ndalet dhe ne kërkojmë ekzistencën e saj, pasi dukshmëria e saj nuk arrin perceptimin. “Një luftë blu shpallet midis penelit dhe syrit të vetë artistit, i cili është më i izoluari në atë kuti”, shprehen ata në tekst. Kompozimet e Mohammad Ramadan janë të pikturuara me ngjyra të ftohta, përmbajnë shkallëzime të heshtura dhe delikate në të zezë, bardhë dhe gri, silueta të kapura me delikatesë, me një vizatim e linjë ekspresive, që shprehin mjaft emocion.