Teatri Eksperimental: Arti krijon individë të shëndetshëm mesazhi i shfaqjes  "Të lundrojmë pa internet”

"Të lundrojmë pa internet”, një shfaqje për fëmijët dhe gjithë familjen do të vijë në skenën e Teatrit Kombëtar Eksperimental “Kujtim Spahivogli”. Ejani në teatër, shkruan Teatri Eksperimental, pasi është koha për të qëndruar më pak online e më shumë së bashku. “Sot fëmijët kanë më shumë nevojë se kurë të largohen nga varësia teknologjik. Arti është ai që krijon individë të shëndetshëm e mbi të gjitha njerëz më të mirë. Ky është mesazhi që shfaqja  "Të lundrojmë  pa internet", e cila vjen në datat 28 dhe 29 nëntor në ora 19:00 në ambientet e Teatrit Eksperimental do të përçojë për të gjithë publikun”, shkruan teatri për shfaqjen, që vjen në skenë me regji nga Najada Elmazi. "Të lundrojmë pa internet" është shfaqja edukative -argëtuese që vjen përmes fëmijëve të talentuar. Në materialin e teatrit thuhet se aktorët e vegjël do të interpretojnë për të dhënë mesazhe, jo vetëm për bashkëmoshatarët e tyre, por për të gjithë shoqërinë. “Tema kryesore e shfaqjes është koha që ne duhet ti kushtojmë teknologjisë dhe përdorimit të internetit. Mesazhet janë të rëndësishme, të gjithë duhet të jemi të informuar për rreziqet dhe rregullat që përdoren gjatë aplikacioneve të ndryshme. Fëmijët vijnë në skenë me etyde, dialogje duke përcjellë së bashku mesazhe të rëndësishme si të qënit së bashku, të socializuar, luajmë dhe rritemi. Krijojmë marrëdhënie të shëndetshme e bëhemi më të afërt me njëri - tjetrin. Është koha për shoqërizim dhe jo izolim. Teknologjia po i individualizon fëmijët tanë, po i bën asocialë”, thuhet në material. Çdo skenë në shfaqjen me regji nga Elmazi zhvillohet duke krijuar karaktere dhe duke përdorur elementë të artit skenik. Qëllimi është fëmijët ti mësohen si të kalojnë kohën e lirë, si të argëtohen dhe të jenë sa më socialë. “Një kulturë që duhet të përfshijë gjithë familjen. Nuk do të mungojnë elementët komik, të qeshurat si dhe energjia pozitive nga aktorët e vegjël. Në skenë do të ngjiten pjesëmarrës nga mosha 4 deri në  13-të vjeç”, thuhet nga teatri.