Teatri Eksperimental hap thirrjen për projektet artistike, prioritet në 2023 dramaturgjia shqiptare bashkëkohore, europiane e më gjerë 

Dramaturgjia shqiptare  bashkëkohore , europiane dhe më gjerë do të jetë prioritet në aktivitetin artistik këtë vit, që ka nisur në Teatrin Kombëtar Eksperimental “Kujtim Spahivogli”. Një ditë më parë Teatri Eksperimental hapi thirrjen e parë për projektet artistike, që do të realizohen gjatë vitit 2023. TKE bën me dije  kjo thirrje është e vlefshme dhe për bashkëprodhimet teatrore këtë vit. “Njoftojmë hapjen e thirrjes së parë për procedurën e aplikimit për projekte artistike për vitin 2023 për Teatrin Kombëtar Eksperimental “Kujtim Spahivogli” . Prioritet kanë projektet që synojnë shfaqje bashkëkohore me prioritet dramaturgjinë shqiptare bashkëkohore, europiane e më gjerë. Thirrja e Teatrit Kombëtar Eksperimental “Kujtim Spahivogli” është e vlefshme edhe për bashkëprodhimet”, thuhet në njoftimin e Teatrit Kombëtar Eksperimental “Kujtim Spahivgoli”. TKE vijon se të gjithë krijuesit, regjisorë, producentë, koreografë, dramaturgë, muzikantë janë të mirëpritur që të sjellin projektet e tyre për: Projekte artistike për shfaqje për të rritur; Projekte artistike për shfaqje për adoleshentë dhe të rinj; Projekte artistike për shfaqje për fëmijë. “Dosja duhet të përmbajë: CV të aplikantit; Projekt propozimi; Përshkrim të projektit; Sinopsin dhe tekstin”, thuhet në njoftimin e bërë një ditë më parë nga Teatri Kombëtar Eksperimental. Dokumentacioni për projektet artistike teatrore të këtij viti dorëzohet fizikisht pranë njësisë së protokollit të Teatrit Kombëtar Eksperimental “Kujtim  Spahivogli”. Dorëzimi u bë me dije se nisi më 25 janar dhe do të vijojë deri më datën 28 shkurt të këtij viti nga ora 09:00-14:00 në Teatrin Kombëtar Eksperimental “Kujtim Spahivogli”, rruga “Sami Frashëri”, ArTurbina.

 Aktiviteti artistik

Teatri Kombëtar Eksperimental e nisi këtë vit aktivitetin artistik me koreografin Gjegj Prevazi si drejtor. Drejtori i ri i Teatrit Eksperimental ka shprehur se platforma e tij synon produksione të teatrit bashkëkohor, nga vendi, rajoni dhe më gjerë. “Kjo platformë synon përshtatjen me një qasje më bashkëkohore të produksioneve, çka do tu jepte një hapësirë edhe jashtë vendeve produksioneve tona. Kjo përmes përmirësimit të estetikës dhe rritjes së nivelit për përshtatjen me tregun ndërkombëtar”, u shpreh më parë drejtori i ri i TKE. Koreografi Gjergj Prevazi kreu studimet në Akademinë e Arteve të Bukura në degën e koreografisë. Më pas artisti bëhet pjesë e trupës profesioniste në teatrin “Aleksandër Moisiu” si koreograf i këtij teatri dhe më pas bëhet koordinator në qendrën Ndërkombëtare të Kulturës në Tiranë. Ai është koreografi i parë shqiptar që ka eksperimentuar dhe lëvruar stilin Dance Theatre, me të cilin e çoi teatrin dhe lëvizjen skenike shumë hapa para duke pashkë punuar me regjisorë të mirënjohur nga Shqipëria, Kosova, Maqedonia, etj.