Teatri Eksperimental me shfaqjen “Unë, Mefisto” në Festivalin e Teatrit Shqiptar “Moisiu”

Teatri Kombëtar Eksperimental “Kujtim Spahivogli” u prezantua me shfaqjen “Unë, Mefisto” në Festivalin e Teatrit Shqiptar “Moisiu”, që po zhvillohet në Shkup. Teatri Kombëtar i Kosovës, Teatri Shqiptar Shkup, Teatri Kombëtar i Shqipërisë, Teatri Kombëtar Eksperimental “Kujtim Spahivogli” prezantojnë këtë vit sëbashku Festivalin e Teatrit Shqiptar “Moisiu”, ku marrin pjesë trupa teatrore nga tre shtete. Bazuar dhe inspiruar nga Goethe & Klaus Mann dhe nga eksperiencat individuale të çdokujt në shoqëri erdhi për spektatorin dhe shfaqja “Unë, Mefisto”. Një bashkëpunim ndërballkanik me artistë nga Shqipëria, Kosova, Bosnja, Serbia në drejtimin e Dino Mustafic. Shkruar nga Johan Wolfgan Von Goethe, Klaus Mann, Jeton Neziarj, Paul Eluard, Goran Simic, Klaudia Piroli, Musine Kokalari. Vepra erdhi në skenën e festivalit me aktorët Ilire Vinca, Ema Andrea, Ermir Jonka, Rafael Hoxhaj, Matia Llupa, Krist Lleshi, Ilia Kaçi, Florist Bajgora, etj. As/regjisor Melisa Novosel, koreografi Gjergj Prevazi, kompozitore Irena Popovic, skenograf  Beqo Nanaj, kostumografia Iliriana Basha, graphic design Sara Kapo. I lindur në Bosnje, Dino Mustafic, e ka lidhur jetën herët me skenën. Ai është diplomuar në Akademinë e Arteve të Bukura në Sarajevë, dhe ka një aktivitet të vlerësuar teatror. Në aktivitetin e tij me teatrin, regjisori boshnjak ka qenë për 20 vite rresht drejtor artistik i MESS Festival të Sarajevos, cilësuar si një nga 4 festivalet më të mira të teatrit në Europë. Me teatrot e tjerë shqiptarë deri më tani regjisori Dino Mustafic ka bashkëpunuar për shfaqje të ndryshme teatrore. Festivali nisi më datë 16 dhe do të vijojë deri më 27 nëntor në Shkup, Maqedonia e Veriut. Teatri Kombëtar i Shqipërisë në këtë festival që zhvillohet në Teatrin Shqiptar Shkup u prezantua me veprën “Ivanov” nga Anton Çehov.