Teatri i Korçës me komedinë “Nata e dymbëdhjetë” në Athinë

Trupa e aktorëve e teatrit “Andon Zako Çajupi” në Korçë me komedinë “Nata e dymbëdhjetë” të Shekspirit do të jetë tre net në teatrin "Neos Akadimos" në Athinë, Greqi. Vepër nga William Shakespeare që e sjell skenë regjisori Dhimitris Milonas. Kryevepra e Shekspirit me regji nga Milons shënoi disa muaj më parë premierën në qytetin e Korçës, por u shfaq dhe në festivalin “KokoFest”. “Nata e dymbëdhjetë” e Shekspirit do të shfaqet në Athinë në datat 29 dhe 30 shtator, si dhe 1 tetor në mbrëmje. Kjo komedi, e cilësuar si nga veprat më të mira të Shekspirit, ngjarjet e së cilës zhvillohen në Iliri sjell në role një kast aktorësh të njohur dhe të rinj. Në rolet e veprës janë Luiza Xhuvani, Guri Koço, Gent Hazizi, Zamira Kita, Dasara Xhangolli, Kristian Koroveshi, Paola Kodra, Xhuliano Brisku, Silvio Giskova, Juxhin Plovishi, Franc Bregu, Ergis Dervishi, Marius Hajdaraj, Gabriela Ahmeti, Roxhers Nexhipi, Dhionis Vitollari, Fludea Harizi. Skenografia Beqo Nanaj, koreografia Gjergj Prevazi, kostumografia Olta Bello dhe muzika Fatos Qerimaj. Vepra është përkthyer nga Vedat Kokona. Shekspiri konsiderohet si shkrimtari më i shkëlqyer i gjuhës angleze, në mënyrë absolute, një ndër shkrimtarët më të mëdhenj të të gjitha kohërave. Ai ka qenë komediograf, dramaturg, por edhe aktor. Veprimtaria dramatike e Shekspirit u zhvillua në kuadër të teatrit elizabetian dhe ka si kuadër historik mbretërimin e Elizabetës I (1558- 1603). Kjo epokë njihet dhe si epoka e artë e teatrit anglez. Përkrah teatrit klasik, ky teatër përbën dukurinë më të rëndësishme për teatrin botëror në përgjithësi. Në këtë periudhë lëvrohen të gjitha llojet e dramatikës me të njëjtin sukses madje pasurohen me elemente të reja.