Teatri Kombëtar rikthehet më shfaqje në skenë fundjavën e ardhshme

Teatri Kombëtar pas disa ditësh do të rikthehet në skenë me shfaqje. Të mërkurën institucioni bëri me dije se në skenë do të jetë për publikun vepra teatrore “Coriolanus”. “Të dashur miq, ju njoftojmë se, Teatri Kombëtar rikthehet në skenë fundjavën ardhshme. Duke shpresuar të mos kemi më pengesa, ju presim me një nga kryeveprat e William Shakespeare dhe një produksion madhështor të TK “Coriolanus”  27-28-29-30 janar”, shkruan teatri në njoftimin e tij. Po ashtu TK shprehet në shënimin e tij se të gjithë spektatorët që posedojnë biletë (të padëmtuar) të datave 13-14-15-16 janar, mund ta konvertojnë atë për një nga datat e reja të produksionit "Coriolanus" 27-28-29-30 Janar. Gjithashtu, rimbursimi i biletave (të padëmtuara) vijon pranë biletarisë tonë te “ArTurbina””, thuhet nga institucioni. Ndërkohë, Teatri Kombëtar do të marrë masa për zbatimin në mënyrë rigoroze të protokolleve të miratuara kundër përhapjes së Covid-19.  “Ju bëjmë me dije se mbajtja e maskave është e detyrueshme për të gjithë spektatorët që dëshirojnë të ndjekin shfaqjet tona. Teatri Kombëtar do të mundësojë distancimin social në sallën e madhe 400 pranë “ArTurbina” për të gjithë spektatorët që dëshirojnë të ndjekin shfaqjet tona. Për shkak të ruajtjes së distancës së sigurisë, salla e madhe 400 “ArTurbina” do të funksionojë me 30 për qind të kapacitetit. Teatri Kombëtar do të mundësojë dezinfektant për duart në ambientet e tij pranë “ArTurbina”, thuhet nga TK. Këtë fundjavë teatri do të vijojë me aktivitetin artistik online, të cilin e bëri me dije të martën. Pjesë e të cilit janë mbrëmje me poezi, lexime artistike të veprave teatrore, etj. “Coriolanus” produksion i TK, një kryevepër e Shekspirit shënoi premierën në dhjetor të 2021 te “ArTurbina”. Nën drejtimin e regjisorit të njohur Altin Basha, për kryeveprën e Shekspirit janë angazhuar aktorë të Teatrit Kombëtar, por dhe të rinj të Universitetit të Arteve.