TKOB: Angelin Preljocaj përcolli mjeshtërisht “Gravity”, si një nga koreografitë e tij më të njohura

Festivali Ndërkombëtar i Kërcimit Bashkëkohor po zhvillon edicionin e dytë në Tiranë dhe u hap me shfaqjen “Gravity” me koreografi nga Angelin Preljocaj. Për dy net me radhë në mbrëmjet e datave 27 dhe 28 shtator në skenë u shfaq “Gravity”, e cila u ndoq nga një publik i gjerë artdashësish. Teatri Kombëtar i Operës dhe Baletit shprehet se koreografi i suksesshëm Angelin Preljocaj solli në skenën tonë një nga koreografitë e tij më të njohura. “Përgjatë 2 netëve mikpritëm një publik të gjerë artdashësish, për të çelur së bashku edicionin e dytë të Festivalit Ndërkombëtar të Kërcimit Bashkëkohor, me premierën e baletit “Gravity”, i sjell nga maestro Angelin Preljocaj. Koreografi i suksesshëm në skenat botërore,  frymëzuar nga konceptet abstrakte, hapësirën, kozmosin e peshën e trupit, përcolli mjeshtërisht "Gravity-n", si një nga koreografitë e tij më të njohura”, thuhet nga TKOB, që ka ndarë dhe disa foto të shfaqjes nga trupa “Ballet Preljocaj”. Teatri Kombëtar i Operës dhe Baletit në bashkëpunim me Qendrën për Kulturë dhe Art Bashkëkohor “Harabel” dhe D18 Paris organizojnë edicionin e dytë të Festivalit Ndërkombëtar të Kërcimit Bashkëkohor, ku drejtor artistik i festivalit këtë vit është koreografi i njohur Angelin Preljocaj. Në kuadër të festivalit që do të zhvillohet deri në 23 tetor, Ballet Preljocaj, La Veronal & Marcus Morau, Blenard Azizaj dhe Fondazione Nazionale de la danza/Aterballetto sjellin artin dhe eksperiencën e tyre në Tiranë. Më herët sipas Teatrit Kombëtar të Operës dhe Baletit këtë vit, festivali zgjeron shtrirjen e tij përtej shfaqjeve magjepsëse të kërcimit për të përfshirë një sërë masterclass-e të kryera nga koreografë të kompanive pjesëmarrëse.