TKOB: “Karnavalet” do të kthehen në shtëpi

Opereta “Karnavalet” prodhim i Teatrit Kombëtar të Operës dhe Baletit, që pati sukses në Tiranë këtë mbrëmje do të shfaqet në qytetin e Korçës. TKOB shprehet se do të jetë në Korçë pas katër mbrëmjeve, që ishte më parë në Tiranë. ““Karnavalet” do të kthehen në shtëpi! Prodhimi më i ri i Teatrit të Operës dhe Baletit, “Karnavalet”, i cili korri sukses të jashtëzakonshëm në Tiranë, përgjatë 4 netëve, do të udhëtojë drejt qytetit të zanafillës së saj, Korçës, aty ku janë lënë gjurmë të thella celuloidi të kulturës artistike dhe nga ku u frymëzua artisti i madh, kompozitori i veprës, Avni Mula”, thuhet nga TKOB. Me pjesëmarrjen e veçantë të Inva Mulës, e cila i dha jetë produksionit me idetë e saja regjisoriale, Orkestrën Simfonike të TKOB-së, dirigjuar mjeshtërisht nga Elda Laro, si dhe Korin e TKOB-së, dirigjuar nga maestro Dritan Lumshi, duke bashkëpunuar me Orkestrën Simfonike të Forcave të Armatosura, vepra do të jetë këtë mbrëmje pranë teatrit “Andon Z. Çajupi” në Korçë. Shkruar nga Avni Mula, opereta “Karnavalet” është me libret të Luigj Gurakuqit. Opereta “Karnavalet” është me tre akte. Ajo është punuar sipas motiveve të komedisë së mirënjohur të Spiro Çomorës “Karnavalet e Korçës”, në të cilën demaskohet e vihet në lojë shoqëria e kalbur feudalo-borgjeze së bashku me regjimin antipopullor të kohës. Në vepër, në të njëjtën kohë, pasqyrohet edhe qëndresa e lufta e popullit punonjës dhe e vegjelisë së qytetit kundër këtij regjimi. Autorët e operetës, duke u mbështetur në motivet qytetare kombëtare, kanë arritur të japin me dinamizëm dhe gjallëri atmosferën e përpjekjeve të njerëzve të dalë nga gjiri i popullit. Vepra është me kostumografi të frymëzuar nga estetika e viteve ’30, kuruar nga Elva Bella, skenografi të Romeo Çanit, ku gërshetohet mahnitshëm realistja dhe surrealistja, video-artisti Tan Kazazi.