TKOB: Opera “Don Pasquale” afroi me kulturën operistike pranë dyerve të teatrit një publik të ri

Opera “Don Pasquale” shkruar nga kompozitori Gaetano Donizetti erdhi në skenën e Teatrit Kombëtar të Operës dhe Baletit në vijim të sezonit artistik në këtë institucion. TKOB shprehet se kjo shfaqje mbylli rrugëtimin në skenë, duke afruar një publik të ri. ““Don Pasquale” një shfaqje e jashtëzakonshme e sjellë në kuadër të projektit “Opera për fëmijë dhe familje”, mbylli rrugëtimin dy ditor në skenën magjike të TKOB-së, duke afruar me kulturën operistike, pranë dyerve të teatrit, një publik tërësisht të ri artdashësish. Me idetë regjisoriale të Mariano Bauduinit dhe të as. regjisores Ada Gurra, me mjeshtërinë e Orkestrës Simfonike të Forcave të Armatosura, dirigjuar nga Massimo Spadano, dhe me profesionalizmin e solistëve të TKOB-së, jehonat e të qeshurave u përhap mahnitshëm në gjithë sallën”, shprehet në faqen e tij Teatri Kombëtar i Operës dhe Baletit për këtë vepër. Kur “Don Pasquale” u shfaq për herë të parë në janar 1843 në Paris, Gaetano Donizetti kishte një karrierë të konsoliduar në botën e operës italiane dhe ishte në kulmin e pjekurisë së tij artistike. Ai kishte pasur sukses të madh me operan “Lucia di Lammermoor”, “La Fille du Règiment” dhe vepra të tjera, por nuk kishte arritur të merrte pozicionin e lakmuar të Drejtorit Real “Collegio di Musica” në Napoli. Në një material më parë në faqen e TKOB-së thuhet se tipike për “Don Pasquale” është efektiviteti me të cilin lirika dhe melankolia i kundërvihen buzëqeshjes djallëzore apo edhe të qeshurës së sinqertë të krijuar nga mjeshtri. Libreti i operës “Don Pasquale” i nënshkruar M. A. (Giovanni Ruffini), u bazua në një libret të autorit Angelo Anelli, të muzikuar nga Stefano Pavesi në 1810 me titullin “Ser Marcantonio”. Gaetano Donizetti ishte një kompozitor i njohur italian. Gjatë gjithë karrierës së tij, Donizetti shkroi 74 pjesë muzikore, duke përfshirë opera, masa, kantata, etj.